Cebuano news: Laing pagpananum ug kahoy ang pasiugdahan sa PENRO-Mis. Occ. atol sa Arbor Day, Hunyo 25

PENRO-Mis. Occ. to conduct tree-planting on Arbor Day, June 25

By Pat Nano

Saturday 16th of June 2012

OROQUIETA CITY, Misamis Occidental, June 16 (PIA) -- Magpasiugda ug laing pagpananum sa kahoy ang Misamis Occidental Provincial Environment and Natural Resources Office (PENRO) karong umaabot nga Arbor Day, Hunyo 25.

Kini ang giluwatan ni Antonio Mala Al Haj ang PENRO Officer kinsa midasig usab sa matag LGU kun lokal government units ug mga pribadong sector nga nakipag-alayon sa pagsaulog sa miaging WED kun World Environment Day kaniadtong Hunyo 5 pinaagi sa pagpananom usab sa mga kahoy ug sa pagsuporta sa mga programa sa DENR kun Department of Environment and Natural Resources.

Sa matag tuig, ang nasyonal ug ang mga LGU, uban sa mga environmentalist ang mialayon sa paghandum sa WED, isip kauban sa mga kalihukan nga naglangkob sa Global Issues Awareness and Focus on Positive Action for the Protection of the Environment nga nagdala sa tema nga:”Living Green with the DENR 25 Years Protecting the Philippines Natural Wealth,” karong tuiga.

Kalakip usab sa mga kalihukan ang Eagle Watch Week in Mt. Malindang nga gipahigyon gikan sa Hunyo 4 hangtod Hunyo 10.

Sa laing bahin, dako ang pasalamat ni Edgardo Aguinaldo ang CENRO kun City Environment and Natural Resources Officer sa Oroquieta City uban sa iyang mga kaubanang empleyado sa pagtambong ni Governor Herminia Ramiro atol sa gipahigayon ground-breaking ceremony sa bag-ong gitukod nga duha (2) ka andana nga Bag-ong Oroquieta City DENR-CENRO Building.

Nagkantida sa Php150 million, ang maong proyekto gipundohan sa DENR ng nakalagda nga humanon sulod sa 150 ka adlaw.

Matud pa ni Aguinaldo, dako ang ilang kalipay nga wala gayod pakyasa sa Gobernadora ang ilang pangandoy nga motambong kini sa maong higayon sa groundbreak isip timaan sa hingpit nga pagsugod gayod sa pagtukod niini.

Subay usab niini, mipadayag si Governor Ramiro sa iyang mainitong pasidungog ug suporta ngadto sa mga personahe sa Oroquieta City DENR-CENRO, sanglit dako usab ang iyang kalipay nga mahimo na usab kini nga legasiya sa iyang administrasyon.

Matud pa sa Gobernador, usa sa iyang nahimong legasiya mao pagkahimo sa Bukid sa Malindang nga Mt. Malindang Range Natural Park pinaagi sa iyang pagpaluyo sa Republic Act 9304 series of 2004 niadtong panahon sa iyang pagkakongresista sa distrito dos sa probinsya.

Dugang niini, mipadayag sa iyang pasidungog si Danilo Cacanindin ang Regional Technical Director for Research sa DENR, Region X ngadto kang CENRO Edgardo Aguinaldo sa pagpaningkamot niini nga matuman gayud ang nasangpit nga proyekto.

Iya usab gipasalamatan ang Gobernadora sa gipakita niini nga dakong suporta, sa partisipasyon sa mga lideres sa lokal nga pangagamhanan sa Probinsya sa Misamis Occidental ngadto sa mga kalihukan ug mga programa sa DENR, ug sa mga maayong relasyon niini ngadto sa mga tagdumala sa buhatan sa DENR.

Gipasabot pa niini nga gikinahanglan kaayo ang maong relasyon ug suporta sa mga lokal nga lideres ug sa katawhan alang sa kalampusan ug katumanan sa mga programa nga gi-implementar sa ilang buhatan dinhi sa probinsya.

Gidasig usab ni Cacanindin ang mga empleyado sa Oroquieta City DENR-CENRO sa pagpadayon sa ilang paghatod maayong serbisyo sa katawhan.

Subay niini, dako usab ang iyang pasalamat nga sa kanunay anaa ang mga lokalnga mga lideres sa probinsya ug syudad nga nagsuporta sa ilang mga kalihukan ug mga programa alang sa pagpalambo ug pagpanalipud sa kinaiyahan sa Probinsya sa Misamis Occidental. (PIO/PIA 10, Mis. Occ.)