Cebuano News: Secretary Luistro sa DepEd mimando sa mga maestra nga dili maningil ug amot sa pagbukas sa klase karon Hunyo 4

By Rutchie C. Aguhob

Saturday 2nd of June 2012

OROQUIETA CITY, Misamis Occidental, Hunyo 1 (PIA) – Gimando-an ni Secretary Armin A. Luistro sa DepEd kun Department of Education ang mga maestro sa dili pag paningil ug amot gikan sa mga bata sa kindergarten paingon sa Grade 4, sa bisan unsang panahon sulod sa tuig-tingtungha (SY) 2012-2013.

Kini, sumala sa kamandoan ni Secretary Luistro nga iyang gipakanaug pinaagi sa DepEd Order No. 41, kaniadtong milabay nga Mayo 24, nga naghatag sa mga sumbanan o mga implementing guidelines nga angayan tumanon kalabot sa mga amot sa eskwelahan.

Kini nga kamandoan, matud pa ni Secretary Luistro, iyang gipagawas aron makuhoran o kaha mawala ang kabalaka sa mga ginikanan sa mga nagtipun-og nga balayronon sa pagbukas sa klase karong Hunyo 4.

Nahisubay usab kini sa Constitutional Mandate aron kahatagan sa higayon ang tanang katawhan sa libre nga educasyon ug aron makab-ot ang gilauman nga Millennium Development Goals ug ang katuyoan sa DepEd ng Education for All pag-abot sa tuig 2015.

Si Secretary Luistro, hinoon, miingon nga sugod sa Agusto, ning tuiga, hangtud mahuman ang tuig-tingtungha 2012-2013, mahimo nang mangolekta ug amot apan boluntaryo lamang gayud alang sa mosunod:

Boy Scouts of the Philippines (BSP), Php50 kada estudyante, Girls Scouts of the Philippines (GSP), Php50 kada estudyante, Philippine National Red Cross (PNRC), Php35 kada estudyante ug Anti-TB Fund Drive, Php5 kada estudyante.

Parent-Teacher’s Association (PTA) sa makatarungan nga kantidad nga pagasabutan sa mga membro atol sa usa ka panagtigum sa mga membro, School Publication nga Php60 kada estudyante sa elementary ug Php90 kada estudyante sa high school, ug membership fee sa mga organisasyon sa mga estudyante base sa ilang gisunod nga polisiya.

Apan giklaro ni Secretary Luistro nga ang PTA mahimo lamang nga mangolekta ug amot sugod sa Agosto ning tuiga, human kini makapakita ngadto sa iyang mga membro ug sa School Head o Principal sa report gi-unsa paggamit ang pundo nga nakolekta sa milabay nga tuig-tingtungha, ingon man, makapakita sa gahin sa mga kalihokan sa tuig-tingtunga 2012-2013.

Gikinahanglan usab nga ang kantidad sa amot mag-agad sa nasabutan sa mga membro sumal sa DepEd Memo No. 54 nga gipagawas sa tuig 2009, ingon man, giduso kini sa School Head o Principal.

Hinoon, ang pag duso niini sa School Head o Principal, dili magpasabot nga ang pagkolekta sa amot pinugsanay gayud.

Sa laing bahin, matud paa ni Misamis Occidental Schools Division Superintendent Jonathan S. Dela Peňa, kinsa mipagawas usa ug Division Memorandum kabahin niini ngadto sa tanang mga maestro sa dise-sayes (16) ka distrito ubos kaniya miinong nga ang PTA gipahimagno-an sa dili pagpaningil sa dagkong amotan.

Aron usab dili mabug-atan ang mga ginikanan sa pagpadala sa ilang kabataan ngadto sa eskwelahan, ang mga PTA didasig sa dili pag amot sa dagkong kantidad alang sa graduation ceremonies ug uban pang extra-curricular nga mga kalihokan ug sa dili pagpangayo ug amot sa gitawag nga “in-kind.”

Ang amot usab sa PTA ibase sa kada membro niini ug dili sa gidaghanon sa mga anak nga gipa enroll sa maong eskwelahan.

Agi usab ug suporta sa mando ni Secretary Luistro, si Dela Peňa miingon nga ang pagmantala sa school paper, bisan dili pinugsanay, gidasig nga himoon sa mga eskwelahan aron mahatagan niini ang campus journalism sa kahigayonan aron molambo sa mga eskwelahan sa elementary ug high school s ilang lugar.

Ang balayronon alang sa school publication mahimong itakda sa mga eskwelahan, seguradohon lamang nga dili kini molabaw sa saysenta pesos (Php60) alang sa mga estudyante sa elementarya ug dili mokapin sa nuybenta pesos (Php90) alang sa mga estudyante sa high school, dugang pa ni Dela Peňa. (PIA-Mis. Occ.)