Cebuano news: Pangulong Aquino miila sa mahinugdanong papel sa electric coops sa electricification program

By Franklin P. Gumapon

Saturday 4th of August 2012

DIPOLOG CITY, Agosto 4 (PIA) -- Giila ni Pangulong Benigno Simeon C. Aquino III ang mahinungdanong papel nga gihuptan sa mga electric cooperatives isip katimbayayong sa gobyerno sa electrification program.

Sa iyang pakigpulong atol sa ika-33 nga general membership meetings sa Philippine rural Electric Cooperatives Association, Inc. (PHILRECA) didto sa Philippine Trade Training Center sa Pasay City kagahapon, mipabati sa iyang pasalamat si Presidente Aquino sa ilang suporta sa electrification program sa kagamhanan.

Matud pa ni Aquino nakatabang kaayo ang mga electric cooperatives sa pagkutay ug kuryente ngadto sa mga kabarangayan aron makabaton ug sugang dagitab ang mga molupyo sa tanang dapit.

Gitawag kanhi ug Federation of Electric Cooperatives of the Philippines, ang PHILRECA usa ka kahugpungan sa 119 ka mga electric cooperatives sa tibook nasud.

Natukod kini niadtong Hulyo 1979 isip usa ka non-profit, non-stock ug non-political nga kahugpungan ug narehistro sa National Electrification Administration (NEA), usa ka buhatan sa kagamhanan nga gitahasan sa pagpatuman sa rural electrification program. (JPA/FPG/PCOO/PIA-Zamboanga del Norte)