Cebuano news: Japanese ambassador nag-turnover ug tunghaan sa DepEd

By Ma. Lailani P. Tupaz

Monday 30th of July 2012

QUEZON CITY, Hulyo 30 -- Nag-turnover si Japanese Ambassador sa Pilipinas nga si Toshinao Urabe ngadto ni Education Secretary Armin A. Luistro sa symbolic key alang sa bag-ong gipatukod nga duha ka andana nga napulo ka lawak nga edipisyong tunghaan alang sa mga estudyante sa Maria Clara High School sa Caloocan City.

Gipondohan ang maong edipisyo sa gobyerno sa Japan ubos sa Grant Assistance for Grassroots Human Society Projects aron mahatagan ug maayong dapit pagkat-on ang kapin sa 2,000 ka mga estudyante sa Maria Clara High School, sumala pa ni Education Secretary Armin Luistro.

Mapasalamaton si Luistro sa pagkamanggihatagon sa gobyerno sa Japan nga nakatabang pagtubag sa kakulangan sa lawak tunghaan.

Nagsugod ang MCHS niadtong Hunyo 2000 isip annex school sa Caloocan High School, nga pinakadakong tughaan sa Caloocan City. Ang kasamtangang school site gipanag-iya sa Maria Clara Elementary School. Gihimo kini nga high school paglobo sa populasyon ngadto sa 2,084 niadtong SY 2009 – 2010.

Niadtong tuig 2009, ang school principal nini nga si Helen Grace V. Go mihangyo sa Embahada sa Japan alang sa dugang lawak tunghaan alang sa dugang estudyante. Gisugdan ang pagtrabaho niadtong 2011 ug natapos niadtong nakalabay nag buwan sa Abril.

Kutob niadtong Hunyo 30, 2012, ang enrollment sa maong tunghaan mikabat na sa 2,193. (MLT-PIA 8, Biliran)