Cebuano news: Sertipikasyon sa mga TESDA trainers gipauswag

By Ma. Lailani P. Tupaz

Thursday 14th of June 2012

MANILA, June 14 (PIA) –- Mibutyag si Secretary Joel Villanueva sa Technical Education and Skills Development Authority sa mga detalya sa bag-ong assessment ug certification sa 34,007 ka mga trainers sa nasud aron mapauswag ang kalidad sa pagtudlo sa mga technical vocational education and training (TVET).

Nagtinguha ang TESDA paghimo sa mga trainers ug assessors nga holders sa National TVET Trainers Certificate (NTTC) aron sla makatudlo sa mga technical vocational courses alinsunod sa TESDA Board Training Regulations on Trainers Methodology 1 ug Trainers Methodology II.

Sa 34,007 ka mga TESDA trainers sa tibuok nasud, 17,803 naang nakadawat sa NTTC, samtang ang nahibiling 16,204 ka mga trainers ang mokompleto pa sa mga requirements.

Gidus-og sa TESDA ang application period hangtod sa Septembre 30 niini nga tuig aron maka-apply ug conversion ang mga trainers sa ilang Assessor Qualification/Trainer Qualification (AQ/TQ) certification nga gihatag sa nakalabay nga ahensiya.

Puwede moadto ang trainer sa pinakaduol nga TESDA provincial o district office aron pagsumite sa ilang application ug documentary requirements.

Kadaghanan sa mga trainers naggikan sa National Capital Region (5,222), Region IV-A (3,291), ug Region XI (2,236).

Ang pagkinahanglan sa TESDA ug NTTC sa mga trainers, nagtinguha lamang pagpataas sa qualification diha sa natad sa technology ug methodology alang sa de kalidad nga pagtudlo.

Ang competency assessment sa mga trainers alinsunod sa Philippine TVET Trainers Qualification Systems (PTTQS) nga nag-ila sa kakayahan sa mga TVET trainers sa nagkalain-laing levels.

Ang edukasyon sa TESDA mao na karon ang gikinahanglan sa pipila ka mga sector sa industriya sama sa information technology-business process outsourcing industry, tourism, ug construction.

Ang mga aplikante alang sa NTTC mopaubos sa panel sa mga eksperto kinsa maoy mo-interview, ug mo-evaluate sa trainers sa iyang pagpakita sa kakayahan pagtudlo.

Ang certificate nga ihatag sa kwalipikado nga trainer balido sulod sa lima ka tuig. Ang assessment fee nga P700 abagahon sa TESDA gikan sa Training for Work Scholarship Program (TWSP) fund. # (Translated by MLT/PIA 8 Biliran)