Cebuano News: DepEd mibahad sa mga pribadong eskwelahan nga wala pa mahatagi ug pagtugot

By Ma. Lailani P. Tupaz

Thursday 31st of May 2012

PASIG CITY, Mayo 31 (PIA) -- Gimandoan na sa Department of Education (DepEd) ang tanan regional offices pagsumite sa listahan sa mga pangalan ug address sa mga pribadong eskwelahan nga gihatagan na ug permit sa gobyerno aron magiyahan ang mga ginikanan ug estudyante kung asa sila mopa-enroll. Ang deadline pagsumite sa listahan anha sa Mayo 31, sumala pa sa press report sa ahensiya.

Iplastar ang maong listanan sa tanan regional ug division offices, municipal halls ug uban pang mga dayag nga dapit aron mapasabot sa publiko ang mga giila ug gitugotan nga mga pribadong eskwelahan sa nasud.

Si Education Secretary Br. Armin A. Luistro, FSC, miawhag sa mga ginikanan pagsuta kung ang pribadong eskwelahan nga sudlan sa ilang mga anak aduna ba’y permiso aron madaling masayran sa departamento ang mga unaccredited private schools ug mahatagan dayon sa madaling aksyon.

Si Luistro midugang nga posibleng magkaproblema sa pagkat-on sa mga kabataan sa mga unaccredited private school gumikan sa unauthorized curriculum. Kung wala moagi sa proseso sa government accreditation ang pribadong tunghaan, dili makaseguro ang ahensiya kung mosunod ba kini sa minimum academic standards nga gilaan sa nahitungdang ahensiya.

Ang mga estudyante nga motapos sa mga elementary ug sekondarya sa mga pribadong eskwelahan nga walay permiso sa gobyerno, gitambagan pagkuha sa Philippine Validating Test (PVT) usa pa sila madawat sa laing eskwelahan aron pag-validate sa ilang nahibaw-an.

Ang PVT gipahigayon sa National Education Testing and Research Center didto sa DepEd Central Office.

Ang master list of private schools nga adunay DepEd accreditation makita diha sa DepEd website, www.deped.gov.ph. (Translated by MLT-PIA 8, Biliran)