Cebuano News: GSIS mipagawas sa 200 ka mga college scholarship grants

By Ma. Lailani P. Tupaz

Wednesday 16th of May 2012

PASAY CITY, May 16 (PIA) -- Mipasabot si GSIS President ug General Manager Robert G. Vergara nga sugod kagahapon nga adlaw puwede na mopili ang mga empleyado sa gobyerno nga gagmay lamang ug suweldo sa ilang anak nga makakuha sa College Scholarship Program sa Government Service Insurance System (GSP) diin 200 ka mga slots ang gigahin alang sa school year 2012-2013.

Isip kabahin sa ika-75 nga anibersaryo, ang kasamtangang Board of Trustees miusab sa scholarship program aron maseguro nga mahatagan ug oportunidad ang mga gagmay ug suweldo nga mga empleyado nga mahatagan sa de kalidad nga edukasyon ang ilang mga anak.

Dili sama sa mga nahiunang scholarship programs nga gipaagi sa electronic raffle ang pagpili sa mga scholars, pillion na karon sa GSIS ang mga scholars diha sa mga aplikante nga pinakagamay ang sweldo sa ginikanan.

Ang scholarship program karon maghatag na sa kinatibuk-ang tuition ug miscellaneous fees nga dili molapas sa P20,000 ug binuwan nga allowance nga 2,000.

Puwede mokuha ang scholar ug upat ka tuig nga kurso apan gikinahanglan niyang makaabot sa scholastic requirements nga gitalaan sa programa.

Ang 200 ka mga scholarship slots bahinon sa matag rehiyon depende sa gidaghanon samga miyembro niini. Mopili ang GSIS ug 60 ka mga scholars sa NCR; 3 sa CAR; 9 sa Region 1; 9 sa Region 2; 16 sa Region 3; 10 sa Region 4-A; 1 sa Region 4-B;11 sa Region 5; 14 sa Region 6; 10 sa Region 7; 11 sa Region 8; 12 sa Region 9; 11 sa Region 10; 9 sa Region 11; 10 sa Region 12; ug 4 sa Region 13.

Nakahatag na ang pension fund sa kinatibuk-ang 1,371 ka mga scholarship grants sukad pa niadtong 1998 diin 404 ang kasamtangan pang nagtungha sa nagkalain-laing kolehiyo ug unibersidad sa nasud.

Gawas pa sa scholarship program, naghatag ang GSIS ug P4,000 nga educational assistance sa mga miyembro niini nga pagabayaran sulod sa lima ka tuig sa six percent interest rate.

Alang sa kompletong listahan sa GSIS-accredited educational institutions ubos sa GSIS College Scholarship Program ug uban pang mga detalye, puwede motawag sa 479.3645 ug 976.4970 o mobisita sa pinakaduol nga GSIS office o sa website - www.gsis.gov.ph. (Translated by MLT-PIA8, Biliran)