Cebuano News: 30 ka mga job fairs sa EV ipahigayon sa DOLE

Tuesday 13th of March 2012

TACLOBAN CITY, Mar. 13 (PIA) -- Mahatagan na ug oportunidad ang mga bag-ong migradwar sa kolehiyo ug mga nangita ug trabaho dinhi sa Eastern Visayas tungod kay naglaan na ug pipila ka mga job fairs sa nagkalain-laing dapit sa rehiyon ang regional office sa Department of Labor and Employment uban sa koordinasyon sa mga local government units (LGUs), sumala pa ni Labor Department regional director Exequiel Sarcauga.

Si Director Sarcauga miingon nga kabahin sa departamento ang pagtabang sa mga nangita ug trabaho ang pagpahigayon ug job fairs diin 5.4 porsiyento sa kasamtangang unemployment rate sa rehiyon ang gilaomang mosaka sa pagtapos sa mga estudyante niini nga tuig.

Bisan ug wala pa man ipasabot ang mga nakalaan nga trabaho ug mga kompanya ug establisamento nga molakip sa job fairs sa DOLE, miseguro siya nga makakuha ug trabaho ang mga nangita ug trabaho.

Nahisayran nga mimando si Labor Secretary Rosalinda Baldoz nga gikinahanglan nga maempleyo on the spot ang 15 porsiyento sa mga aplikante sa job fairs.

Sanglit nanawagan ang labor director sa tanan nangita ug trabaho ug mga bag-ong migradwar sa pagbisita sa Public Employment Service Office (PESO) managers sa ilang mga dapit aron sila matabangan pagpangita ug trabaho.

Miesplikar usab ang director nga bisan pa man ug adunay mga job fairs aron matabangan pagpangita ug trabaho, miawhag gihapon ang DOLE sa paglambigit sa pagnegosyo.

Miingon usab si Director Sarcauga nga mohatag ang ilang buhatan ug starting kits alang niadtong gusto molambigit sa cellular phone repair o cosmetology. Samtang kadtong gustong makat-on ug mga kakayahan sama sa plumbing o carpentry ilang i-refer ngadto sa Technical Education and Skills Development Authority (TESDA).

Nahisayran usab nga mo-refer gihapon ang DOLE niadtong gusto motrabaho sa gawas sa nasud. Apan ang departamento miingon nga dili kini maoy ilang prayoridad nga ihatag. (Translated by MLT-PIA8 Biliran)