Cebuano news: Aquino gov't naglaom nga ang senado magpasa sa sin tax reform bill ngadto sa usa ka balaudnon

By Flordelis E. Jackson

Friday 17th of August 2012

MANILA, Agosto 17 (PIA) -- Ang Aquino administration nagpahayag ug paglaom nga ang Senado mo-pasa sa Sin Tax Reform Bill nga adunay tumong ug tinguha sa pag-angkon ug kita sa gobyerno aron pagpalig-on sa health care system sa nasud, matod pa opisyal sa Palasyo karong adlawa, Huwebes.

“Ang Senado nagsugod sa committee hearings karong adlawa kabahin sa bill nga naglaan sa excise taxes nga ipataw sa mga ilimnon ug mga produkto sa tabako. Kung mapasa, kini nga bill makapa-usbaw sa kita ngadto sa mokabat sa 31 bilyones ka pesos diha sa unang tuig sa iyang implementasyon,” matod pa sa pahayag ni Presidential Communications Development and Strategic Planning Office (PCDSPO) Secretary Ramon Carandang karong adlawa, Huwebes.

“Kining maong pundo mangadto sa pagpaluag sa basic health care, ilabi na ngadto sa mga kabus nga Filipino,” matod pa ni Carandang.

Ang pagpasa sa Sin Tax Reform Bill magpalig-on sa health care system sa nasud tungod kay ang buhis nga makolekta gikan sa sigarilyo ug ilimnon gilauman nga mo-pundo ug expanded health care coverage, matod pa ni Carandang.

“Adunay mokabat sa 17.3 ka milyon ang mga mo-sigarilyo dinhi sa nasud Pilipinas. Kasagaran kanila gikan sa mga low income classes ug sila dili maka-akos ug hustong pagpa-tambal sa panahon nga sila masakit gumikan sa pag sigarilyo,” matod pa niya.

“Tungod niini nga rason, atong lauman nga ang Senado makakita ug igong rason sa pagpasa sa Sin Tax Bill. Sa kahumanan, kini nga bill, labing mahinungdanon sa tanan, usa ka health measure. Sa kinatibuk-an, atong pasidunggan si Senator Franklin Drilon sa iyang pag suporta,” matod pa niya. (LDL/Translated by flor Jackson-PIA8, Biliran)