DA magtukod ug corn mill dinhi sa probinsya sa biliran

By Flordelis E. Jackson

Tuesday 5th of June 2012

NAVAL, Biliran, June 5 (PIA) -- Ang Department of Agriculture (DA) regional office no. 8 sa dili madugay mag tukod ug corn mill o galingan sa mais didto sa lungsod sa Cabucgayan sa probinsya sa Biliran diin ang mais maoy kinaon sa mga molupyo sa maong dapit.

Kini sa dili madugay’ng panahon mahimugso kahuman lamang mag mando si Agriculture Secretary Proceso Alcala kang Antonio Gerundio, regional executive director sa DA regional field unit sa Eastern Visayas sa pag tukod sa maong galingan sa mais didto sa Cabucgayan.

Ang mando sa agriculture secretary gipahamtang diha mismo atubangan sa mokabat sa 500 ka mga mag-uuma ug mga manginigsda sa probinsya sa Biliran nga ningtambong sa forum nga gibuhat didto sa Nipa Hut sa provincial capitol grounds durante sa iyang pag bisita sa Biliran province niadtong nakalabayng Mayo 31.

Nahibaw-an ni Alcala nga ang lungsod sa Cabucgayan usa ka lugar dinhi sa probinsya nga nag produce o nag tanom ug mais ug ang naka-sagabal sa pagpalambo sa produksyon sa mais sa maong lungsod mao nga kini wala’y galingan sa mais.

Dugang pa niyang nahibaw-an nga ang pag galing sa mais hangtod nga kini mahimong bugas tua himoon gawas sa lungsod sa Cabucgayan ug kini mangahulugan ug dugang nga gastosan ngadto sa mga mag-uuma ug mais sa lungsod.

Ang agri chief, nag sulti usab ngadto kang Gerundio sa paghatag sa mga corn farmers sa lungsod sa Cabucgayan ug matang sa mais nga gitawag ug “tinigib,” usa ka special variety sa mais.

“Ang pag tukod ug galingan sa mais ug ang paghatag ug espesyal nga matang sa mais ngadto sa mga corn farmers sa Cabucgayan gilauman nga mopalambo sa pananom sa mais sa lungsod, dugang pa ni Secretary Alcala.

Samtang sa laing bahin, si Secretary Alcala nanghatag ngadto sa mga mag-uuma ug mangingisda sa Biliran ug mga kalambuan sa agrikultura pinaagi sa usa ka raffle nga nag lakip sa tulo ka units nga rice threshers, tulo ka units nga hand tractors nga aduna’y trailers, 25 ka units nga pokot pagpangisda, lima ka units nga marine engine, lima ka buok nga Anglo-Nobian nga mga kanding, lima ka kahon nga liso sa sweet corn, 1,000 ka sako sa certified rice seeds, 200 ka mga planting materials, lima ka basket sa nagkalain-laing mga liso sa utanon ug lima ka kabaw nga adunay uban nga mga kahimanan sa pag uma. (Translated by Flor Jackson-PIA 8, Biliran)