Cebuano news: 10,000 ka mga energy-efficient lamps ang ipang-apod-apod lukop sa So. Leyte

Wednesday 19th of September 2012

MAASIN CITY, Southern Leyte, Set 19 (PIA) -- Mokabat sa napulo ka libo ka buok mga compact fluorescent lamps (CFLs) ang ipangkatag ning tibuok lalawigan ingon nga tipik ug kabahin sa hiniusa, nasudnong kalihokan nga gipasiugdahan sa Department of Energy (DOE).

Sumala pa ni Aida Morsen Moralde sa buhatan ni Cong. Roger Mercado, kinsa maoy mag-apod-apod sa mga light bulbs, ang schedule sa pagbuhat niini mao karong Septembre 22 ngadto sa 28.

Ang bugtong rekisitos lamang para maka-angkon sa mga madaginoton nga suga mao nga ang mga miyembro-konsumedor sa Southern Leyte Electric Cooperative (Soleco) mopakita lamang sa ilang kina-uwahian nga nabayran nga monthly bill adto sa Mercado district office, nagkanayon si Moralde.

Matud niya mga 5,000 ka mga panimalay sa probinsiya ang makapahimus ning maong inisyatibo, sa tagurha ka suga kada usa, ubos kini sa Philippine Energy Efficiency Project (PEEP) sa DOE.

Segun sa iyang technical nga bentaha, ang usa ka CFL lamp dunay kusog nga 14 watts, apan ang iyang kalamdag bugti sa 75 watts ug gamay ra ang ma-konsumo sa kuryente.

Ang PEEP gipakatap sa tanang 182 ka mga congressional districts tibuok nasud, lakip mga partylist representatives, alang sa overall budget nga P 3.6 milyon ug ang target nga 1.8 milyon ka mga households ang mahayagan sa mga CFLs lukop sa Pilipinas, si Moralde miingon.

Alang sa pag-apod-apod sa Southern Leyte, si Moralde miingon ang ilang opisina nag-tinguha makig-alayon sa mga barangay captains, labina kadtong tua sa mga lagyong bahin sa probinsiya. (translated by mmp/PIA8-Southern Leyte)