Cebuano news: Pag-apod-apod og family food packs ngadto sa mga biktima sa baha giunhan ni Aquino

By Marcelo M. Pedalino

Thursday 9th of August 2012

MANILA, Agosto 9 (PIA) -- Usa ka adlaw tapos sa bug-os nga pag-ulan nga maoy hinungdan sa pagbaha sa Metro Manila, si Presidente Benigno Aquino III naningkamot makasabwag gihapon og pagdasig ug paglaum ngadto sa mga flood victims diha sa pagpanguna niya pagpanghatag og mga family food packs didto sa Tunasan, Muntinlupa City, pagka Miyerkoles.

Ang Presidente nanghatag og mga relief packs nga may solud mga noodles, salmon, corned beef, bugas, ug kape ngadto sa 784 ka pamilya (1,920 ka mga tawo) gikan sa lain-laing barangay nga naglibot sa Laguna Lake kinsa nangatandog gyod gumikan sa baha.

May gipahigayon nga hamubong briefing kabahin sa nagapadayon nga rescue and relief operations ug kini gihimo ni Social Welfare and development Assistant Secretary Milo Gudmalin.

Sa iyang hamubo nga pagpamulong, ang Presidente nagpasalig sa mga katawhan nga ang gobyerno, pinaagi sa mga local government units, naglihok kutob sa mahimo niini aron pagtanyag og mga basic services niining panahona sa kalamidad.

Nagpadayag siyag kahimuot nga bisan pa sa ilang kahimtang, ang mga katawhan sa Tunasan nagkatawa lang gihapon ug hupong sa paglaum.

Mikuyog sa Presidente mao sila si Transportation and Communications Secretary Mar Roxas II, Public Works and Highways Secretary Rogelio Singson ug Energy Secretary Jose Rene Almendras. (EOPT/Translated by mmp-PIA8, Southern Leyte)