Cebuano news: So. Leyte migamit sa DOT slogan isip tema sa ika-52 nga anibersaryo

By Marcelo M. Pedalino

Sunday 17th of June 2012

MAASIN CITY, Southern Leyte, June 17 (PIA) -- Gamiton karon ning lalawigan ang kasagaran nga linya nga nahimong inila pinaagi sa Department of Tourism (DOT) diha sa selebrasyon sa ika-52 nga founding anniversary karong Hulyo 1.

Si Nedgar Garvez, provincial Tourism officer, misugilon sa Philippine Information Agency (PIA) sa pakighinabi sa telepono pagka Huwebes, nga sa gihimong miting bag-ohay pa lang gikaigoan nga gamiton ang “It’s more fun in Southern Leyte” nga mga pulong ingon nga maoy tema sa provincial anniversary.

Ang mao nga pulongon gipasibo sa agresibo nga kampanya nga gilusad ug gipasiugdahan sa tourism department, nga nang-agni og mga bisita ug mga balikbayan sa pag-anhi sa nasud tungod kay mas alegre dinhi, o “it’s more fun in the Philippines.”

Aron pagpasulbong sa mas alegre nga anib sa tinuig nga kasaulogan sa probinsiya, himoon ang grand opening sa Maasin City zoo, nga nailhan sab isip Maasin Nature and Wildlife Park, didto sa Danao Forest Park nga gikatakda buntag sa Hunyo 30, kon usa ka adlaw sa dili pa ang kahugan sa anibersaryo, sulti pa ni Garvez.

Ang zoo, nga labing una sa iyang matang sa Region 8, nagpahigayon na og soft opening duha ka bulan na ang nakalabay, pagka Abril 26, tinambongan sa lain-laing mga provincial chambers of commerce sa rehiyon, ingon man pipila ka mga regional heads of offices.

Nasayran nga ang bag-o pa lang nangabot nga mga hayop sa zoo sama sa mga zebra, buaya, tigre, camel, ug uban pa, kinahanglan pa i-kondisyon aron makasagop sa bag-o nilang palibot, hinungdan nga nalangan ang pormal nga pagbukas sa zoo alang sa pagtan-aw sa publiko.

Ang zoo maoy ikaduha sa lima ka mga man-made attractions nga buhaton sa probinsiya aron maka-posisyon kini ingon nga playground sa Eastern Visayas, ang una mao ang zipline sa Agas-Agas, Sogod.

Ang laing tulo nga giplanohang mga proyekto nga hiniusang gidumala sa provincial government ug sa Southern Leyte Chamber of Commerce and Industry (SLCCI) ug gipaluyohan sa lain-laing mga local government units mao ang canopy walk sa mga kakahoyan sa birhen nga lasang sa Silago, ang Napantao dive sanctuary sa San Francisco, ug shrine sa porma nga dakong cross sa Limasawa island.

Samtang si Garvez miingon ang ubang mga kalihokan nga may kalabutan sa 52nd anniversary mao ra gihapon, sama sa inter-agency sports competition ug inter-local government unit sports competition, agri-aqua fair, cycling, rescue Olympics, ug Miss Southern Leyte pageant pagka gabii sa Hunyo 30. (EOPT/mmp-PIA 8, Southern Leyte)

S