Cebuano News: Departamento sa edukasyon andam pagdala sa K+12 program, ingon ang Palasyo

By Marcelo M. Pedalino

Thursday 14th of June 2012

MANILA, June 14 -- Gipakalma sa Malacanang ang kahingawa sa publiko karong adlawa, Miyerkoles, kalabot sa pagpatuman na sa K+12 program, kay ang Department of Education mipasalig nga ang mga gikinahanglang pag-pangandam gipahigayon na alang sa malamposong pagpatuman sa programa karong tuiga.

Usa ka magbabalaud ang miduso nga i-angan-angan ang implementasyon sa programa, gitumbok niya ang kakulang sa preparasyon sa education department labina ang kakulang sa mga libro, classrooms, ug training sa mga magtutudlo.

Sa press conference sa Malacanang, si Presidential Spokesman Edwin Lacierda miingon iyang gihisgutan ang K+12 program uban sa mga school officials sa Bulacan, kinsa nagkanayon excited na sila kalabot niini ug ang DepEd malamposon nang naka-train og mga maestra/maestro para niining programaha.

Ang K+12 usa ka kabag-ohan sa Department of Education aron masunod ang pipila ka mga kasabutan, si Lacierda miingon samtang iyang gisulti ang Washington accord, nga nag-awhag sa nasud magbaton na og 12-year basic education.

Ang mga Filipino professionals dili dawaton pagsulod sa mga trabahoan kon ang Pilipinas mapakyas pagtuman sa maong requirement, miingon si Lacierda. Gihisgutan sab niya ang Bologna accord nga nanawagan alang sa sama nga pagtuman.

Matud ni Lacierda nga kining duha ka mga kasabutan mga international treaties, apan wala makapirma ang nasud kay wala pa man makatuman sa lagda.

Sa pagka karon, dunay kakulangan mga 50,000 ka lawak tunghaan, ug sumala kang Lacierda mga 20,000 niini ang buhaton sa mga local government units, ug ang laing 30,000 i-bid sa gobyerno pinaagi sa public-private partnership (PPP) ilawom sa DepEd.

Gawas nga tumanon ang mga international standards, ang K+12 importante tungod kay maghatag kini sa mga estudyante og kapilian nga mangita dayon og trabaho kon dili na sila mo-enroll sa college, si Lacierda miingon.

Ang gobyerno mipirma og pipila ka mga kasabutan tali sa mga business organizations pinaagi sa Philippine Chamber of Commerce and Industry nga nagtinguha pagdawat sa mga graduwado ubos sa K+12 program, dugang niya. (EOPT/Translated by mmp-PIA8, Southern Leyte/ PCOO)