Cebuano news: Aquino nagsaad nga magduso ug malungtaron nga kasulbaran sa baha

By Teresita B. Cardenas

Friday 10th of August 2012

MANILA, Agosto 10 (PIA) -- Kahuman makigpulong sa pumupuyo sa Marikina City sa ilang mga kabalaka, ang Presidente Aquino utro nga nagingon sa Huwebes sa atubangan sa katawhan sa Quezon City nga ang iyang pamunoan nagtrabaho paghan’ay ug malungtaron nga kasulbaran sa walay hunong nga problema sa baha kahuman sa makusog nga ulan.

Sa iyang pagpakigpulong sa mga nadapatan sa baha nga panamtang nga gibutang sa Bagong Silangan basketbol gym sa Quezon City, ang Presidente nagingon nga iya nang gimandoan ang Department of Public Works and Highways ug ang tanan nga may kalabutan nga ahensya nga maghan’ay ug sigurado nga kasulbaran nga makatubag sa baha sa siyudad.

Ang Public Works Secretary Rogelio Singson, nga kauban ni Presidente, nagingon nga ang laraw nga malungtaron nga kasulbaran mao ang paghimo ug mga paril ug salud sa tubig gikan sa ibabaw sa suba nga mga dapit nga katampo sa suba sa Marikina river nga magpahinay pagpaawas sa baha nga tubig nga magbuhagay ngadto sa kabukiran nga sumpay sa siyudad sa panahon nga dunay mabangis nga panahon.

Iyang gisaysay nga ang paghimo niini magpahinay pagpaawas sa tubig gikan sa kabukiran nga nahimutang sa Antipolo, San Mateo ug Rodriguez sa probinsya sa Rizal magpasayon sa mga awasan paglimas sa tubig sa ulan paingon ngadto sa dagat.

Ang Presidente nagingon nga sa sunud semana, ang pagtinagsa sa himoon sa malungtaron nga kasulbaran nga plano ipagula aron ang may kalabutan nga ahensya makasugod pagtrabaho aron makab’ot ang plano.

Kahuman sa iyang pagpakigpulong sa katawhan, ang Presidente nanguna sa pagbahinbahin sa mga pinutos nga pagkaon sa mga nawad’an ug panimalay nga pumupuyo. (EOT/Translated by Teresita B. Cardenas-PIA8, Northern Samar)