Cebuano news: Aquino nagpasalig nga 6,000 nga dugang nga sitios butangan elektrisidad sa katapusan sa tuig

By Teresita B. Cardenas

Friday 3rd of August 2012

MANILA, Agosto 3 (PIA) -- Ang pumupuyo sa mga halayo nga rehiyon sa Pilipinas sa dili madugay makapahimulus sa benepisyo sa elektrisidad sa ilang panimalay kahuman ang Presidente Aquino magsaad nga ang 6,007 nga mga sitios sa labing halayo nga barangay sa nasod mahatagan ug elektrisidad sa katapusan sa tuig.

Ang Presidente naghatag sa iyang pasalig sa iyang pagpakigpulong sa ika 33 nga Annual General Membership Meeting of the Philippines Rural Electric Cooperatives Association, Inc (Philreca) nga gihimo sa Philippine Trade Training Center sa Pasay City sa Huwebes.

Ingon niya nga kahuman sa iyang duha ka tuig sa katungdanan, ang iyang administrasyon, sa tabang sa Department of Energy ug National Electrification Administration ug ang stakeholders sama sa Philreca, sa hinayhinay apan sa tinuud magdala ug kaayohan sa elektrisidad ngadto sa mas daghan nga mga Pilipino.

Ang Presidente nagpasabut nga kini nga dakong buhat nahimo pinaagi sa maayo nga panggobernohan ug sa kabubut’on sa katawhang Pilipino.

Iyang gidugang pagingon nga gikan sa Oktubre 2011 ngadto sa Hulyo karong tuiga, 2400 nga sitios duna nay elektrisidad.

Ang Presidente nagangkon nga samtang daghan pa ang angayan himoon aron mahatagan ug elektrisdad ang tanan, sa tabang sa enerhiya nga sector, ug ang mga stakeholders ug sa katawhang Pilipino, kini nga dako nga katungdanan mahimo nato. (GTT/Translated by TBC/rck-PIA8 Northern Samar)