Waray news: KABISIG naglunsad hin gov't. expo ngan trade fair

Thursday 14th of June 2012

QUEZON CITY, June 14 (PIA) -- Naglunsad an KABISIG Movement hadton Hunyo 12, Martes nga adlaw bahin han kanan gobyerno panalingkamot nga magkamay-ada government expo ngan trade fair nga kon diin an katuyu-anan hini en para mapaharani an mga katawhan pinaagi han paghatag hin mga serbisyo hadton magdirodilain nga mga ahensya han gobyerno.

Sumala kan Daniel C. Guillen, KABISIG Movement chairman, nga an nasabi nga expo ngan trade fair, nga ginbuhat didto ha Events Center han SM Fairview, en nagserbi komo one-stop exhibit hadton mga serbisyo ngan mga nabuhat hadton mga ahensya han gobyerno kaupod na hini dinhi adton mga government-owned and -controlled corporations (GOCCs).

Nagdugang pa hin pagsering hi Guillen, nga an panhitabo en nakapaghatag ngan nakapagpa`tagamtan hadton mga katawhan hin mas-masarusayon nga pakibulig tikang hadton mga magdirodilain nga mga ahensya han gobyerno ngan nakapag-paangbit hin damo nga mga impormasyon bahin hiton mga programa ngan mga proyekto nga nabuhat han gobyerno.

Duranti hini nga okasyon, may-ada mensahe ni President Benigno Aquino III nga ginbasa ni Custom Commissioner Ruffy Biazon nga nasering, importante gud nga pakurukosgon pa an kooperasyon ha butnga han gobyerno ngan han publiko tipakadto han katumanan han aton ginhihingyap nga maupay nga kahimtang.

Hi Biazon en nagdugang pa hin pagsering nga an Presidente en paliwat-liwat nga iya ginhihimangraw an iya ginhatag nga pagpatapod hadton mga katawhan Filipino nga an iya administrasyon en padayon nga komitido han iya paghatag hin tambulig ngan suporta hadton mga programa nga may panuyo nga matadong adton mga kinatuyawan ha gobyerno labi na gud an panlilimbong ngan para makab-otan naton an kauswagan han aton ekonomiya.

An Kabisig program, en ginhimo han bisa o kadarayawan pinaagi han Presidential Proclamation No. 650 hadton 1990, nga nagmamando para mapadali ngan pag-alinsusunuron an pag-implementar hadton mga programa han gobyerno.

Samtang hi President Aquino en nagpagawas hin Memorandum Circular No 12 nga nagtutugot hadton mga departamento han gobyerno, ahensya ngan hadton mga kalakip nga mga opisina nga maghatag hin suporta ngada hini nga mga exhibits.

An nasabi nga okasyon en gin-partisiparan hin ma 20 nga mga ahensya han gobyerno ngan mga GOCCs, ngan kada usa ha ira en nagbutang hin booth para ipakita ngan-i-display ha mga eskaparate an ira magdiro-dilain nga ginhatag nga mga serbisyo ngan mga nabuhat ngadto han publiko. (PIA-E. Samar, translated by: SDC/PAE/PIA-Central)