Waray news: Pinanngunahan han Pangulo an komemorasyon han ika-tulo nga anibersaryo han kamatayon ni Cory

By Daniel U. Mausisa

Thursday 2nd of August 2012

MANILA, Aug 2 (PIA) -– Pinanngunahan kakulop ni Pangulo Benigno S. Aquino III an pagtigaman han pamilya Aquino ngan Cojuangco han ika-tulo nga anibersaryo han kamatayon han anay Pangulo Corazon Cojuangco Aquino nga nakalubong, kaupod an iya bana ngan anay Senador Benigno “Ninoy” Aquino, Jr., ha Manila Memorial Park ha Parañaque.

Ginduyogan han Pangulo an iya mga kabugto-an nga hira Maria Elena, Aurora Corazon, Victoria Eliza, ngan Kristina Bernadette, an ira tagsa-tagsa mga pamilya ngan hin maabot 50 han ira duok nga pamilya ngan mga kasangkayan dida hin usa nga misa para han anay Pangulo nga gindumara ni Fr. Catalino Arevalo, SJ.

Gintambongan gihapon baraan nga misa han opisyal nga pamilya ni Pangulo Aquino nga ginrepresentaran nira Health Secretary Enrique Ona, Energy Secretary Jose Almendras, Social Welfare and Development Secretary Corazon Soliman, Transportation and Communication Secretary Manuel Roxas II, Communications Secretary Herminio "Sonny" Coloma, Foreign Affairs Secretary Albert Del Rosario, ngan Defense Secretary Voltaire Gazmin.

Dida han iya sermon, nagsering hi Fr. Arevalo nga an pagtigaman han anibersaryo han kamatayon han imahen han demokrasya han Pilipinas en diri la usa nga katitirok hin mga kasangkayan ngan pamilya kondi usa nga higayon para mag-ampo nga sugad nga mga Pilipino, matagan unta kita hin kapareho nga paghigugma ha nasud nga iginpakita ni anay Pangulo Cory Aquino ngan han iya bana Senador Benigno “Ninoy” Aquino, Jr.

An mao nga okasyon en mahimo daw makagdurot hin higayon agud mapadaga-a ha aton en kaparte han ira paghigugma ha nasud ngan ha aton katawhan, ngan diri para la ngahaw ha mga kalugaringon.

“For themselves, it was a total gift that’s why we honor them; that’s why our country will honor them for many, many years to come. And we pray at this mass this morning that something of that passion, something of that love may enter into us. That it may not be just a question of words, it may be in some way really and truly also the giving of our lives (Para ha ira kalugaringon, usa adto nga hingpit nga gasa salit gindadayaw naton hira; salit pagdadayawon hira han aton nasud ha sakob hin damo pa nga tiarabot nga mga katuigan. Ngan nag-ampo kita dida hini nga misa yana nga aga nga an sugad nga dedikasyon, sugad nga klase hin paghigugma en sumulod ha aton mga kalugaringon. Ngan mahadiri la konta ha mga pulong la, kondi magin tinuod ngan hingpit gud nga pagpahinungod han aton mga kinabuhi),” pahayag pa niya.

Hi anay Pangulo Corazon Aquino en namatay hadton Agosto 1, 2009 tungod hin sakit nga colon cancer. (Ginbinisaya ni DUM/ PCOO-PIA8, Eastern Samar)