Waray news: Paghahatag hin bonus ha mga empleyado, igpapaagi hin ‘performance-based system’

By Daniel U. Mausisa

Wednesday 11th of July 2012

MANILA, July 11 (PIA) Agud maaghat an mga empleyado ha gobyerno ngan mga institusyon nga buhaton an ira tagsa-tagsa mga buruhaton lapos pa hiton normal nga nahihimo, igpapatuman han administrasyon ni Pangulo Benigno S. Aquino III an performance-based o nakabase hiton mga nahimo nga sistema hin paghahatag hin bonus nga iglalakip dida han 2013 General Appropriations Act, sering ni Budget Secretary Florencio Abad kakulop.

Dida han press briefing ha Malacañang, ginpahayag ni Abad nga ini nga bag-o nga pamaagi hin paghahatag hin bonus ngadto hin takus o kaangayan nga mga empleyado ngan mga institusyon en subay hiton direktiba ni Pangulo Aquino nga pag-uruyonon an ngatanan nga performance-based management systems ha gobyerno.

Segun kan Abad, panuyo nira nga mapabaskog an responsabilidad han panpubliko nga mga institusyon ngan mga magtratrabaho ha gobyerno dida hiton ira mga buruhaton, salit padayon daw nira nga ginpapabakod an performance budgeting ngan gintuturono an ngatanan nga performance-based management systems ha gobyerno.

An mao nga kadugangan nga bonus en iba la han regular nga productivity enhancement incentive nga ginhahatag ha mga empleyado ha gobyerno ngan mga institusyon kada tuig.

An performance-based nga sistema hin paghahatag hin bonus en titikangan igpatuman sunod nga tuig kon diin maabot hin 5,000 ngada hin 35,000 pesos an makakarawat han kada empleyado labot la han makakarawat pa nga 5,000 pesos nga productivity enhancement incentive, pahayag ni Abad.

Nagsering hiya nga dugang pa nga mga detalye mahiunong hini nga incentive program en mahihibaro-an ha tidaraon nga panahon. (Ginbinisaya ni DUM/ PCOO-PIA8, Eastern Samar)