Waray news: Naglalaom an Pilipinas nga pinaagi han $1 bilyon nga kontribusyon hini ha IMF, mabubuligan an mga nasud nga nagkukuri

By Daniel U. Mausisa

Friday 22nd of June 2012

MANILA, June 22 (PIA) -– Komo kabahin hiton unibersihanon nga komunidad, responsabilidad han Pilipinas nga buligan an iba nga mga nasyon nga aada hin pinansyal nga kakuri-an. Salit, inamot an nasud hin $1 bilyon ngadto han kaban han International Monetary Fund (IMF).

Ginpahayag ni Presidential Spokesman Edwin Lacierda dida hin usa nga press briefing ha Malacañang kakulop nga ha sakob han nakalabay nga 40 anyos, an Pilipinas en nakaagom man hin ayuda han IMF. Ngan komo nga ginkokonsiderar na an Pilipinas yana nga creditor nation o nagpapautang nga nasud, obligasyon daw naton an pagbulig ngadto hin mga nasud nga nagkikinahanglan hin pondo tikang ha IMF. Makakabulig ini agud masurapo an krisis nga natatabo ha Europa, sering pa ni Lacierda.

Han pakianhan hiya han mga peryodista kon paonan-o mahigagarantiya han gobyerno ngada han katawhan nga an $1 bilyon nga pautang ngadto ha IMF en magagamit ha husto nga paagi, baton ni Lacierda nga natuo hiya nga hihirotan ini han IMF. Naabot na hin $456 bilyon an reserbado nga pondo yana han IMF ngan $1 bilyon an nahi-amot naton ngada han mao nga pondo, sering ni Lacierda.

Segun han Bangko Sentral ng Pilipinas (BSP) dida hin usa nga pahayag hini hadton Miyerkules, nagpahamtang an Pilipinas hin $1 bilyon nga pautang ha IMF agud maayudahan an unibersihanon nga mga paningkamot nga mapabakod an ekonomiya ha kalibotan ngan mamentinar an pag-ursa.

Komo kaapi hin unibersihanon nga komunidad hin mga nasyon, mayda obligasyon an Pilipinas ha pagseguro nga maparig-on an situwasyon pan-ekonomiya ngan pinansyal palibot han kalibotan, sering pa han mao nga pahayag han BSP. An mga pautang ha IMF en ig-aasister ngadto hin mga nasud nga nag-aagi hin pinansyal nga kakuri-an agud mapagarugaan ngada hiton ira molupyo an diri paborable nga mga epekto hini.

Ha sakob hin haros 40 anyos ngada tubtob han 2006, nangungutang an Pilipinas ha IMF kataliwan ig-implementar en padayon nga mga reporma nga nagpabakod han ekonomiya han nasud, sumala han BSP.

Mababayaran daw an Pilipinas han iginpautang hini ha IMF nga mayda pa interes. Salit, labot nga ganansyado an Pilipinas, nakakabulig pa daw kita han iba nga mga nasud nga nagkukuri pinansyal, pahayag pa han BSP. (Ginbinisaya ni DUM/ PCOO-PIA8, Eastern Samar)