Waray News: Online programs han TESDA hilu-ag na an naabot; mga nan-gradwar hini maupay na iton mga trabaho

By Daniel U. Mausisa

Thursday 21st of June 2012

MANILA, Hunyo 21 -- Nakaangkla dida hiton kan Pangulo Benigno S. Aquino mga programa ha paghikay hin mga panarabaho-an ilarum hiton iya kontrata para han kapulsanan han katilingban, iginpasamwak han Technical Education and Skills Development Authority (TESDA) an padayon hini nira nga implementasyon han TOP o kon TESDA Online Program nga nagtatanyag hin mga paghag-id ngadto hin interesado nga mga indibiduwal ha ano man nga oras, mahadiin man nahimumutang ngan ha maarakos nga gastos.

Dida han report ni TESDA Director General Joel Villanueva ngadto kan Pangulo Aquino, iginsaysay niya nga an TESDA Online Program ha pagkayana en mayda maabot hin 19,968 nga rehistrado nga mga kliente tikang han iglunsad an mao nga programa han naglabay nga Mayo, ngan naabot na hin 553,583 an page views hini.

Ginpahayag ni Villanueva nga an mga gradwado han TOP en maupay na yana an mga trabaho ngan nakakagtagana na hin mauruupay nga kalidad hin panginabuhi ngadto han ira tagsa-tagsa mga pamilya.

Hi TESDA “Specialista” Griselle Claveria nga ha online kumuha hin Computer Hardware Servicing NC II en nagtratrabaho na yana ha Singapore. Natuo hi Claveria nga an programa han TESDA nga iya ginkuha amo an nakagsangkap ha iya han ginkikinahanglan nga teknikal nga mga kahibaro nga nagin bentaha ha iya para han iya trabaho yana.

Hi Jhonathan Luzano, nga anay sales promoter, en nagkaada hin maupay nga trabaho komo usa nga laptop ngan computer technician kataliwan niya matapos an iya online nga kurso ngan kataliwan pumasar han national competency assessment.

Ha pagkayana, upat nga online nga mga kurso iton abelable ilarum han TOP. Ini amo an Computer Hardware Servicing NC II, Room Attendant Servicing NC II, ngan Cellphone Servicing nga usa han mga kabatiran han Consumer Electronics Servicing NC II.

Nagsering hi Villanueva nga ginhihingita han administrasyon Aquino nga makagtanyag hin kabug-osan nga napulo nga mga kurso ha sakob hin usa ka tuig komo kaparte han padayon nga pagpalambo han online nga programa ha edukasyon. (Ginbinisaya ni DUM-PIA8, Eastern Samar/PCOO)