Waray news: Duha nga dagku nga mga proyekto, iginpasamwak han Malacañang

Friday 1st of June 2012

MANILA, Hunyo 1 -- Gin-aprobaran han National Economic and Development Authority (NEDA) hadton Miyerkules en implementasyon hin duha nga mga proyekto, segun han pahayag han Malacañang kakulop.

Nagdumara hin miting hadton Miyerkules ha Malacañang an NEDA Board nga ginmamangulohan ni Pangulo Benigno S. Aquino III.

Durante han regular nga press briefing ha Malacañang, nagsering hi Deputy Presidential Spokesperson Abigail Valte nga sakob han walo nga mga proyekto nga ginhiruhimangrawan durante han miting, duha la an gin-aprobaran han board.

An siyahan nga proyekto amo an Ninoy Aquino International Airport (NAIA) Expressway, an ika-duha nga bayhon han Expressway project nga mayda kabug-osan nga kantidad nga P15.8 bilyon.

An ika-duha nga proyekto amo an National Sewerage and Septage Management Program, usa nga proyekto nga aada ha primero nga bayhon kon diin nakantidad ini hin P26.3 bilyon.

Duha ka semana na an nakakalabay, gin-aprobaran han Investment Coordination Committee-Cabinet Committee (ICC CabCom) han NEDA Board en lima nga mga proyekto nga nakantidad hin P32.67 bilyon para hin pagtukod ngan pag-ayad hin mahinungdanon nga mga imprastraktura sugad hiton mga kalsada, mga tulay, ngan mga ospital.

An NEDA Board amo an kanan nasud pinakahitaas nga tigplano pankauswagan ngan tigkoordinar hin mga palisiya nga hugpo. Ginkokompuwesto ini hin maglainlain nga Cabinet secretaries, an presidente han Union of Local Authorities of the Philippines, an gobernador han Autonomous Region in Muslim Mindanao, ngan han deputy governor han Bangko Sentral ng Pilipinas (BSP).

An Investment Coordination Committee amo an nag-eebalwar han mga implikasyon ha pananalapi hiton dagku nga mga proyekto nasyonal. (Ginbinisaya ni DUM/PIA-8, Eastern Samar/PCOO)