Waray news: Ginhingadayan han Pangulo an mga benepisyo han mga proyekto nga magkokonektar han Northern ngan Southern Luzon Expressways

Thursday 24th of May 2012

MANILA, Mayo 24 -- Gintagan hin duon ni Pangulo Benigno S. Aquino III an mahinungdanon nga mga benepisyo nga mahidudurot ngada han ekonomiya han nasud han duha nga ginlaladngan nga mga proyekto hin kalsada nga magkokonektar han northern ngan southern Luzon expressways. Ha panahon nga makompleto ini, masmagmamadagmit daw an pagbibiyahe hin mga produkto, serbisyo ngan han mga katawhan mismo ngadto hiton ira kakadto-an, mahuhukalan hin mga motorista an panguna nga mga kakalsadahan ngan maiiban-ibanan an polyusyon.

Dida han briefing mahiunong han North Luzon Expressway (NLEX) ngan South Luzon Expressway (SLEX) connector projects ha Malacañang kakulop, nagsering an Pangulo nga an katawhan Pilipino an benepisyado hini nga mga proyekto hin kalsada.

An nasabi nga mga proyekto amo an NLEX-SLEX Connector han Metro Pacific Investment Corporation ngan an Metro Manila Skyway Stage 3 nga proyekto han San Miguel Corporation.

Panuyo han duha nga mga proyekto nga magtukod hin elevated toll roads nga magkokonektar han NLEx ngan SLEx nga pagdudumaraon ha ilarum han public-private partnership (PPP) projects han gobyerno.

An NLEX-SLEX connector en usa nga P21-bilyon nga “connector road” nga nakonsister hin 13.4 ka kilometro, four-lane elevated expressway ha bawbaw hiton na-eksister nga Philippine National Railway tikang ha Caloocan City ngadto ha Makati City.

Samtang an MMSS3 en proposisyon para hin nakantidad hin P24 bilyon nga 14 ka kilometro, six-lane tollway nga mayda gawasan ha Manila, Aurora Boulevard, E. Rodriguez Ave., Quezon Boulevard, Sgt. Rivera ngan lugar han Balintawak.

Ginlalaoman nga makakabulig ini nga mga proyekto nga mahukalan an EDSA ngan magmamasayon an pakakadto hiton mga pantalan han Manila.

Ginpahayag ni Pangulo Aquino nga mahibibiyahe an mga produkto han mga manufacturing business ha norte ngan sur nga parte han nasud hin diridiretso ngan ha madarudagmit nga panahon, ngan ha sugad nga kaagi magmamamurumenos an ira gastos kon diin an matitirok tikang hini en magagamit pa nira hin pag-empleyo hin darudamo nga mga trabahante.

Segun han Pangulo, kon an mga paninda en igkakarga ha barko pinaagi han pantalan ha Manila, diri malilikayan nga umagi ha EDSA ngan dako nga oras an magagamit dida hiton pagbiyahe labot pa han polyusyon nga mahidudurot hini ha NCR. Salit ini nga mga proyekto hin kalsada en magpapasarusayon han bug-os nga proseso, sering niya.

Labot la nga napapasarusayon hini an pagbibiyahe han mga produkto, serbisyo ngan mga tawo, nagigin madagmit man an biyahe ha butnga han Ninoy Aquino International Airport ngan Clark International Airport, sering han Pangulo.

Nagsering gihapon an Pangulo nga makakabenepisyo man an industriya han turismo tikang han konstruksyon hini nga mga proyekto hin kalsada tungod nga magigin masayon na an pagbiyahe ngadto hin tourist spots ha norte ngan sur nga dapit han Luzon.
“Syempre ‘yung tourism is greatly enhanced as well …by 2016 I assume I’ll be in Tarlac a lot and if I want to go to a beach, medyo biglang naging very feasible to go to Batangas or Mindoro or, ‘di ba, all of these other areas—or even taking flights to Boracay or Palawan,” pahayag pa han Pangulo (Ginbinisaya ni DUM/PIA-8, Eastern Samar/PCOO)