Waray news: Pilipinas nagdaug ha ika-5 nga ASEAN Regional Quiz

By Gemma T. Tabao

Monday 6th of August 2012

MANILA, Aug 6 (PIA) -– An grupo han Pilipinas, nga ginkokomponer han mga fourth year high school nga mga estudyante nga hira Franchesca Anne Inacay han St. Albert the Great School ha Dagupan City (Region I), Kristiyanne Paul de Pedro han Koronadal National Comprehensive High School (Region XII), ug Maria Angela Krizelle Rubin han San Joaquin National High School ha Calbayog (Region VIII) – in nagin mga kampiyon han ika-5 nga ASEAN Quiz Regional Competition nga ginbuhat ha Phnom Penh, Cambodia han Agosto 3, nga nanguna han 27 nga iba pa nga mga contestant tikang ha Brunei, Cambodia, Indonesia, Laos, Malaysia, Myanmar, Thailand, ug Viet Nam.

An grupo han Pilipinas in nakakuha hin kabug-usan nga score nga 71 points. An Cambodia in nagin hirani nga mayda 70 points samtang an Thailand in nakakuha hin 68 points.

An paisan-isan in nagkaada hin tulo ka round: an siyahan nga round in mayda True or False items (20 points), an ikaduha nga round, in mayda Multiple Choice items (20 points), ug an ikatulo nga round, in mayda Fill in the Blanks items (40 points).

Ha siyahan nga round, an kanan Pilipinas grupo in nakakuha hin perfect score nga 20 points. Ha ikaduha nga round, an grupo in nakakuha hin 19 ha 20 points samtang an ikatulo nga round, an grupo in nakakuha hin 32 points.

An Pilipinas in pirmi nagdadaug ha ASEAN Quiz Regional Competition. Han 2002 an Pilipinas in nakakuha han siyahan ug ikaduha nga lugar ha nag-uusahan nga kategoriya han paisan-isan. Han 2004, an nasud in nakakuha han siyahan nga lugar samtang han 2006, an Pilipinas in nagdaug han ikaduha nga lugar. An Pilipinas in otro nga nagdaug han siyahan nga lugar han 2009.

An mga interesado nga mga sekondarya nga mga eskwelahan nga kariyag bumulig ha sunod nga ASEAN Quiz Competition in pwede mag e-mail ha Department of Foreign Affairs' ASEAN Secretariat ha asean.philippines@dfa.gov.ph. An ASEAN Quiz mechanics ug iba pa nga mga pasabot in makikita gihapon ha internet. (EOPT/Translated by GTT-PIA8/PCOO online news)