Waray news: Aquino nagdayaw han papel han mga electric cooperatives kumo kasugbong han gobyerno ha iya electrification nga programa

By Gemma T. Tabao

Saturday 4th of August 2012

MANILA, Aug 4 (PIA) -- Hi Pangulo Benigno S. Aquino III in nagdayaw han papel han mga electric cooperatives kumo kasugbong han gobyerno ha paghatag hin elektrisidad ha ngatanan nga mga Pilipino ano man ka hirayo hira ha Manila.
Ha iya mensahe durante han ika-33nga Annual General Membership Meeting han Philippine Rural Electric Cooperatives Association, Inc. (PHILRECA) ha Philippine Trade Training Center ha Pasay City han Huwebes, an Pangulo in nagpasalamat han mga kooperatiba han elektrisidad para han ira suporta ug dedikasyon ngadto han kanan gobyerno electrification nga programa.

“Diri madidiwara an dako nga papel nga kinakaptan han mga electric cooperatives para maseguro nga an mga kasuruksurukan nga mga sitio ngan barangay nga hadto in masirom in malalamragan na yana dara han pinasarang nga adbokasiya naton nga mapalamrag an kada eskina an nasud,” sering han Pangulo.

“Sanglit, ha ngaran han kada tagsa nga Pilipino nga nabubuligan niyo, kinasing-kasing ako nga nagpapasalamat han mga mayor, miyembro, ug ha siyento dise nuwebe nga bulig nga kooperatiba han Philippine Rural Electric Cooperatives Association o Philreca,” dugang pa niya.

Anay kilala nga Federation of Electric Cooperatives of the Philippines, an PHILRECA amo an nangunguna nga organisasyon han 119 nga mga electric cooperatives nga naoperar han bug-os nga nasud.

Ini in gin-organisar han Hulyo 1979 kumo waray stock, waray ganansiya, ug diri namomolitika nga organisasyon, ug rehistrado ha National Electrification Administration, an ahensya han gobyerno nga ginmanduhan pag-implementar han rural electrification nga programa. (translated by GTT/PIA8/PCOO online news)