Waray news: Sobra 370K Grade 7 nga mga estudyante nakarawat hin ayuda pinansyal tikang ha gobyerno ha SY 2012-2013

Monday 18th of June 2012

MANILA, June 18 (PIA) -– An Department of Education in nagdugang hin 98% nga kadamo hin kontrata para hin serbisyo ha edukasyon para han tisulod nga Grade 7 nga mga estudyante nga naghihingyap nga magpadayon an ira sekondarya nnga edukasyon ha pribado nga mga eskwelahan dara han sobra na kadamo ha panpubliko nga mga eskwelahan.

Hi Education Secretary Br. Armin A. Luistro FSC in nagsering nga an kadamo han slot in nagdugang tikang ha 190,536 han School Year 2011-2012 ngadto ha 377,227 yana nga tuig ha ilarom han Government Assistance to Students and Teachers in Private Education (GASTPE) nga programa. “Nag alotaga kami hin kadugangan nga slots para han Grade 7 (First Year High School) nga mga estudyante paghatag hin durudamo nga mga estudyante hin tsansa nga makasulod ha high school ug makatapos han ira panguna nga edukasyon,” dugang pa niya.

An kantidad nga ihahatag in nagdugang gihapon tikang ha P5,500 ngadto ha P6,500 para han mga First Year Education Service Contracting (ESC) nga mga tigkarawat ha gawas han National Capital Region pagtikang han tuig 2012-2013.

Subay han nahipapatik ha DepEd Memo 94 s. 2012, an kadugangan han kadamo han slots in ginbase ha panginahanglan, ug sumala han normal nga kapasidad han pagdara han panpubliko nga mga eskwelahan ha sekondarya. Para ha Luzon, an slots in nagdugang tikang ha 101,520 han naglabay nga tuig ngadto ha 223,781 yana nga tuig; tikang ha 39,035 han naglabay nga tuig ngadto ha 74,106 yana nga tuig para ha Visayas; ug tikang ha 49,981 ngadto ha 79,341 ha Mindanao para yana nga tuig.

An GASTPE in naayuda han matrikula han mga estuydyante nga nasulod ha pribado nga mga high school kabalyo han panpubliko nga high schools kay an urhi in diri na nakakaakos ha ira.

An Regional Program Committee han GASTPE in responsable para han pagdistribwer han kanan Grade 7 ESC slots ha kada napartisipar nga eskwelahan base ha panginahanglan ug ha kanan eskwelahan pagpakita han kapasidad paggamit han slots nga ginhatag ha ira.

Hi Luistro in nagsering an report han pagdistribwer ngan paggamit han ESC slots in igpapasa ngadto ha DepEd Central Office antes o ha Hunyo 30, 2012. (translated by GTT/PIA8/PCOO online news)