Waray news: Palasyo nagreport hin humitaas nga koleksyon hin buhis han Bureau of Internal Revenue

By Gemma T. Tabao

Saturday 16th of June 2012

MANILA, June 16 (PIA) –- An Malacanang in nagreport han Biyernes hin paghitaas hin koleksyon han buhis han Bureau of Internal Revenue (BIR) dara nga an mga opisina ha iba iba nga mga rehiyon in nagtalaan hin mauruupay nga koleksyon hin buhis ug kaupayan tikang ha mga dagko nga mga manburuhis nga mga serbisyo.

“Ginpasabot kami nga an koleksyon han BIR tikang ha Mayo 2012 in aada ha P95.55-bilyon nga 7.26 porsyento tikang han Mayo 2011. Han Mayo 2011 an koleksyon amo in P89.15-bilyon, yana in aada na ha P95.55-bilyon ha kita han buhis,” sering ni Deputy Presidential spokesperson Abigail Valte ha press conference ha Malacanang han Biyernes.

Han pagpakianhan han mga reporter kun diin nahipapatik han BIR an paghitaas han koleksyon han buhis, hi Valte in nagsering nga an koleksyon tikang ha mga opisina han magkalain-lain nga rehiyon in nagpakita hin pagdoble nga numero ha pagtubo han siyahan nga lima ka bulan. Labot la hini, an koleksyon tikang han dagko nga mga manburuhis nga mga serbisyo in humitaas gihapon.

An BIR in nagpauruupay han iya paningkamot nga maabot an target han koleksyon yana nga tuig, nga ha syahan nga higayon in nakaabot hin P1-trilyon nga marka. (Translated by GTT-PIA8, PCOO)