Waray news: Malacañang nagpatapod hin mga pitad para han mga biktima han flashfloods ha Mindanao

By Gemma T. Tabao

Thursday 14th of June 2012

MANILA, June 14 -- An Malacanang in nagpatapod nga an gobyerno in nagplastar na hin kinahanglanon nga mga pitad para han mga biktima han babaha ha isla han Mindanao nga naigo han tigda nga paghitaas han tubig dara han padayon nga pag-inuran han Martes.

Ha regular press briefing ha Malacanang han Miyerkules, hi Presidential Spokesperson Edwin Lacierda in nagsering nga ngatanan nga mga nahidadabihan nga mga opisina han gobyerno nga pinangungunahan han National Disaster Risk Reduction and Management Council (NDRRMC), Department of Social Welfare and Development (DSWD), Office of Civilian Defense (OCD), Philippine Navy and Philippine Coast Guard in nakatutok han ira mga responsibilidad agud maatenderan an mga panginahanglan han mga biktima ug mapudngan an epekto han pagbabaha hini nga apektado nga mga lugar.

“An NDRRMC amo an nagunguna dinhi, an DSWD in naghatag hin 350 nga mga putos hin pagkaon ha Sultan Kudarat nga lugar… 53 nga mga putos hin pagkaon ha Kidapawan. Ha Sarangani mayda duha nga mga tawo an nawawara, ug an NDRRMC in nagsalbar hin 40 nga mga tawo tikang han babaha,” sering ni Lacierda.

Hiya in nagdugang pa nga labot la han bulig han gobyerno nasyunal, an lokal nga pan gobyernuhan in naningkamot gihapon pagbulig han apektado nga mga residente han lugar.

“Hi Governor [Miguel Rene] Dominguez ug Mayor [Victor James] Yap in naghatag hin mga bulig nga mga butang..., an PDRRMC Sarangani ug NDRRMC Glan kaupod an Office of the Civilian Defense Region 12, Philippine Navy ug Philippine Coast Guards in nanginginano han situwasyon. Hira in nagdumara hin survey ug panginano han danyos, sugad man liwat han panginano han mga panginahanglan han lugar,” sumala kan Lacierda.

“Nangunguna kami dinhi, an DSWD in nag-andam na hini nga mga butang temprano pa han Hunyo 11,” dugang pa niya.

Han Lunes han Hunyo 12, in babaha amo an nakaapekto han tulo nga barangay nga nag-uupod han Barangay Big Margus, Barangay Pangyan ug Barangay Cross ha Glan, probinsya han Sarangani nga nakaapekto hin porluminos 568 nga mga tawo ug nakadanyos hin maabot 162 nga mga balay, samtang 111 in mayda guti nga danyos.

An duha nga namatay in nakilala han NDRRMC nga hira Sagapo Cabigding, 63 anyos han Purok 5, Brgy. Cross, Sarangani ug 40 anyos nga hi Rolando Mata han Brgy Saeg Calumpang General Santos City.

An kinse ayos nga hi Rani Pregoner han Kabatiol, Maasim in nawawara pa sumala kanina han aga.

An Small Margus Bridge ug Pangyan Bridge in medyo na danyos han babaha. (EOPT/Translated by GTT-PIA8, PCOO)