Waray news: MGB-8 mapaso nga ginkaraw bag-o nga regional director

By Marivic A. Alcover

Tuesday 18th of September 2012

PALO, Leyte, Sept 18 (PIA) -- An Mines and Geosciences Bureau (MGB) han Department of Environment and Natural Resources (DENR) ha Sinirangan Bisayas in mayda bag-o nga director.

An pormal nga turnover han tisulod ngan han tigawas nga mga regional director in gindumara dida han Lunes, Septiyembre 17 didto ha MGB Regional Office ha may Baras, Palo, Leyte.

Hi Environment Secretary Ramon J. P. Paje an nagpahamtang han pagbalhin han pipira nga mga opisyal han rehiyon han Mines and Geosciences Bureau, ha ilarum han DENR Special Order No. 2012-669.

Ginpirmahan dida han Septiyembre 5 han secretary, ini in nagbalhin hin tulo nga mga opisyal han rehiyon ha Bisayas ngan Mindanao nga mga rehiyon, upod an Rehiyon 8.

Mahitungod hini, an MGB Rehiyon 8 in pamumunuan na yana ni Officer-in-Charge Regional Director Alfredo T. Relampagos, nga anay nalingkod bali OIC Regional Director ha MGB Rehiyon X.

Iya babalyuan hi Regional Director Roger de Dios, nga ginre-assign ngadto ha Rehiyon XIII. Samtang, hi Regional Director Alilo C. Ensomo, Jr. han Rehiyon XIII an malingkod han ginbakantihan nga pwesto nin OIC-RD Relampagos han Rehiyon X.

Sering ni Paje nga an re-assignment han mga opisyal in may kalabutan han hul-os nga implementasyon han mga prayoridad nga mga plano, mga programa/proyekto ngan mga serbisyo han MGB.

Samtang, hul-os nga ginkarawat ni DENR 8 Regional Director Manolito D. Ragub ini nga bag-o nga panhitabo samtang ginrekognisar niya an mahinungdanon nga mga kuntribusyon ni de Dios dida han iya duha ka-tuig nga pagserbi dinhi ha rehiyon. (Trans. by MAA/PIA8)