Waray news: De Lima iginpagawas desisyon pagbalik ha Judicial and Bar Council bali ex-officio member

Sunday 19th of August 2012

MANILA, Aug 19 (PIA) -– Iginpagawas ni Justice Secretary Leila de Lima an iya desisyon pagbalik ha Judicial and Bar Council (JBC) bali ex-officio member kasunod han gius han gintindog han kunstitusyon nga grupo nga amo an diri pag-upod ha iya dida han shortlist para han masunod nga Chief Justice.

“I will go back to the JBC. I will sit there as an ex-officio member because that is the constitutional mandate of my part,” sering ni de Lima dida han press briefing nga gindumara ha Malacañang han Huwebes.

Sugad han nakapahamtang ha Article VIII Section 8 (1) han Kunstitusyon, an JBC in kinahanglan nga makumponi han Chief Justice bali ex-officio chairman, an Secretary of Justice ngan representante tikang ha Kongreso bali ex-officio members ngan upat nga regular nga mga meyembro nga nakumponi hin usa nga representante tikang ha Integrated Bar, usa nga professor hin law, usa nga retirado nga meyembro han Korte Suprema, ngan usa nga representante nga natikang ha pribado nga sektor.

Sering ni De Lima nga waray hiya nakikita nga problema ha iya utro nga pagtrabaho ha JBC.

An JBC in nagsumite dida han Lunes ngadto kan Pangulo Benigno S. Aquino hin usa nga lista hin walo nga mga nominado para han masunod nga chief justice han Korte Suprema mahitungod nga ha tiarabot nga Agusto 27 an nakatalaan para han pagpalingkod han bakante nga posisyon in natikahirani na.

An lista in diri nag-uupod kan Justice Secretary Leila de Lima. Dida han Lunes an JBC in nagbutosay diri pag-upod kan De Lima, nga ha pagkayana in naatubang hin duha nga disbarment nga mga kaso ha Integrated Bar of the Philippines.

Lima nga Supreme Court “insiders” in upod dida han shortlist, nga nag-uupod kan acting Chief Justice Antonio Carpio (7 nga butos) sugad man kanda Associate Justices Roberto Abad (6 nga butos) ngan Maria Lourdes Sereno (unom nga mga butos), ngan Teresita Leonardo-De Castro (5 nga butos).

Upod gihapon dida han shortlist amo hera Solicitor-General Francis Jardeleza (6 nga butos), anay Executive Secretary Ronaldo Zamora (6 nga butos) ngan Ateneo De Manila University Law Dean Cesar Villanueva (5 nga butos).

An walo nga mga kandidato, nga nakakuha han panguna nga 3, in ginpili tikang dida han 20 nga mga nominado, nga puro umagi han proseso han pagpili nga nag-uupod hin public interview.

Mahitungod nga hiya in usa han mga nominado para han pwesto han Chief Justice, an Justice Secretary in naglikay nga magin ex-officio member han JBC. (Trans. by MAA/PIA8)