Waray news: Ochoa iginpresentar kanan OP P2.7-B budget para tuig 2013

By Marivic A. Alcover

Wednesday 15th of August 2012

MANILA, Agosto 15 (PIA) -- Iginsumiti ni Executive Secretary Paquito N. Ochoa Jr. dida han Martes ngadto ha Senate Committee on Finance an P2.7 bilyones nga panggastos nga plano han Opisina han Pangulo (OP) para tuig 2013, nga an kaudgan amo an pundo para han wage adjustments han mga magtratrabaho ha ilarum han Salary Standardization Law (SSL) ngan han pagpauro-upay han inprastraktura han Malacañang.

Sering ni Ochoa dida han committee hearing nga ginpahiruhitas-an han OP ngadto ha P552.9 milyones an budget para han personal services tikang ha P513.9 milyones para han pagpahiruhita-as han mga sweldo ha ilarum han ika-upat nga parti han SSL nga igin-implementar tinikangan han Hunyo han yana nga tuig.

Pero, sering han Executive Secretary, an pundo nga gingahin para han Maintenance and Other Operating Expenses (MOOE) in pag-iibanan hin 4.1 ka-pursyento ngadto ha P1.88 bilyones tikang ha P1.96 bilyones, bali resulta han ginpauro-upay nga sistema dida han alokasyon han mga pundo ngan pag-ebalyuwar han panggastos.

“Among these activities are the strict implementation of the Procurement Reform Law, the installation of energy saving devices, and the streamlining of processes within the OP,” pag-esplikar ni Ochoa.

An mga Capital Outlay para 2013, ha luyo nga bahin, in papahitas-an ngadto ha P300.4 milyones tikang ha P150.6 milyones para pundohan an panguna nga mga panhingayad, rehabilitasyon ngan pagpauro-upay han iba-iba nga mga estraktura ngan pasilidad, kun diin pipira in gintindog han nakalabay nga malahos usa na kagatos katuig, ha sulod han Malacañang Complex. (EOPT/Trans. by MAA-PIA8)