Waray news: Aquino nagpatapod mga residente ha Marikina an gobyerno in nagtatalinguha permanente nga solusyon pagtapo han babaha

Friday 10th of August 2012

MANILA, Agusto 10 -- Hi Pangulo Benigno S. Aquino III in nagpatapod han mga residente han siyudad han Marikina dida han Huwebes nga an gobyerno in nagtatalinguha nga makagdumara hin permanente nga solusyon para han kanan siyudad permanente nga problema nga amo an pagbinaha ha oras hin makusog nga uuran kun diin an salog ha Marikina in naglalalapwas nga nagigin kawsa han pagbabaha dida han siyudad.

An Pangulo in naghatag han patapod dida han iya halipot nga mensahe matapos mangulo han distribusyon han mga pakete han pagkaon ngadto hin maabot 1,229 nga mga pamilya nga temporaryo nga naserong ha Nangka Elementary School ha siyudad han Marikina.

Sering niya nga naghatag na hiya hin mando ngadto ha Department of Public Works and Highways nga han iba nga nahitutungdan nga mga ahensya nga magdumara hin kumpreshensibo nga plano para hin tibway nga pagtapos hini nga problema hin pagbinaha nga nakakaapekto hin maharani 90 porsyento han siyudad han Marikina.

Hi Public Works and Highways Secretary Rogelio Singson, nga kaupod han Pangulo, in nagsering ngadto han mga residente nga usa nga ginproproponer nga solusyon amo an paghimo hin mga pangpang ngan mga catch basins didto ha hirohitaas nga dapit han salog han Marikina nga magpapahinay han dalagan han tubig tipaubos tikang dida han mga kabugkiran nga nakapalibot dida han siyudad ha oras hin mauran nga panahon. Ini nga mga kabugkiran nga ada ha banda han Antipolo, San Mateo ngan Rodriguez in tanan nakapahamtang ha probinsya han Rizal.

Sering han Pangulo nga ini nga ginproponer nga permanente nga solusyon in kukumpletohan ngada ha katapusan han iya termino ha 2016. Pinanawagan niya an mga residente han siyudad nga bumulig han gius han gobyerno ha pagtapo han problema han pagbinaha kun diin sering niya waray imposibli kun an ngatanan in magkakaurosa para matapo an ginkaurosahan nga tinguha. “Pagtulung-tulungan po natin ito.

Makisama tayo sa isa’t isa at malalampasan natin ito,” sering han Pangulo. “Dumalaw ako sa inyo ngayon para malaman ang kondisyon niyo, kamustahin kayo at para malaman po ninyo na talagang handing-handa ang gobyerno ninyo dito sa pangyayaring ito. Marami pa tayong mapagkukunan para tulungan kayo,” dugang pa niya.

“Asahan po ninyo, hindi naming kayo pababayaan,” sering han Pangulo. (Trans. by MAA/PIA-8)