Waray news: Pangulo Aquino ginkarawat an tigawas nga Cuban Ambassador ha Malacañang

By Marivic A. Alcover

Thursday 5th of July 2012

MANILA, Hulyo 5 -- Ginkarawat ni Pangulo Benigno S. Aquino III an tigawas nga Cuban Ambassador para ha Pilipina, nga hi His Excellency Juan Carlos Arencibia Corrales, nga kumadto ha iya para hin pagsarit matapos hin usa nga produktibo ngan malinampuson nga paglibot kaparti han trabaho ha nasud.

An Cuban Ambassador in nakigkita kan Pangulo Aquino dida hin usa mga simpli nga seremonya ha Music Room han Palasyo han Malacañang dida han Meyerkoles han aga.

Umatinder gihapon dida han seremonya hera Foreign Affairs Undersecretary Erlinda Basilio, Foreign Affairs Assistant Secretary Patricia Ann Paez ngan Foreign Affairs Director Anthony Reyes.

An maiha na nga relasyon ha butnga han Pilipinas ngan Cuba in nagdara hin kaangayan nga mga panhitabo nga nakabenipisyo ngadto han katawhan ha iba-iba nga parti nga nag-uupod han panlawas, hibaro ngan teknoloheya, agrikultura, edukasyon, kultura ngan sports, labot la hin iba pa.

An gobyerno han Cuba in nagbibinulig han iba nga mga nasud nga may kalabutan ha panlawas, lab-i na gud ha pakigbisog kuntra mga sakit, kun diin kadam-an hini in malilikayan ngan matatambal, nga nagpakaunong hin yinukot-yukot nga mga kinabuhi ha bug-os nga nasud.

Hi Ambassador Corrales in umabot ha Pilipinas dida han Septyembre 23, 2010 bali Ambassador-Designate han Republika han Cuba ngadto ha Republika han Pilipinas.

An Ambassador han Cuba in nagserbi bali Senior Diplomatic Officer ha Asya ngan Africa.

Dida han Hulyo, 2011, an Pilipinas ngan Cuba in nagselebrar han ika-65 nga anibersaryo han ka-establisar han ira diplomatiko nga relasyon nga nakakuntribwer hin dako ngadto hin mauro-upay nga pagigi-intindihay ngan magka-usa nga suporta ha butnga han duha nga pangobyernohan ngan han katawhan. (EOPT/Trans. by MAA/PCOO/JCL-PIA8)