Waray news: Aquino mangungulo han paglunsad han 2 nga panguna nga mga benepisyo panlawas

By Marivic A. Alcover

Monday 2nd of July 2012

MANILA, Hulyo 2 (PIA) -- Hi Pangulo Benigno S. Aquino III an mangungundahan han paglunsad han duha nga panguna nga panlawas nga mga programa nga maghahatag han ginkikinahanglan nga mga benepisyo panlawas para han mga Pilipino nga pagdudumaraon dida hin usa nga seremonyas ha Malacañang yana nga adlaw, Lunes.

An Pangulo, kaupod han Department of Health Secretary Enrique Ona, in maglulunsad han kanan DoH Rota Virus Vaccine nga kampanya ngan han kanan Philippine Health Insurance Corporation (PhilHealth) Type Z Benefit Package.

An Rota virus vaccination nga kampanya in una nga ginkahuro-himangrawan dida han ika-13 nga Asian Conference on Diarrheal Diseases and Nutrition nga gindumara han Enero yana nga tuig.

An kampanya in primero nga makaka-benepisyo hin maabot 700,000 ngan mga bag-o nga gin-anak tikang ha 5.2 milyones nga mga pamilya nga ginkilala nga “poorest of the poor” han Department of Social Welfare and Development ha ilarum han ira National Household Targeting System (NHTS).

An Rota virus in usa nga sakit nga nagigin kawsa hin makusog nga diarrhea ngan pagsinuka ha mga kabataan nga nag-iidad ubos hin lima ka-tuig. Ini in ika-duha han mga nangunguna nga nakakamatay nga sakit han ubos lima katuig nga mga Pilipino nga kabataan, nga naihap hin 3,500 nga mga nagkakamatay ha kada-tuig.

Sering ni Ona nga an DOH in magtitikang han kampanya pinaagi hin pagbakuna han mga kabataan tikang han NHTS nga mga pamilya nga igpapanganak tikang ha Abril 2012 ngadto ha Abril 2013.

Samtang, an kanan PhilHealth Type Z Benefit Package in usa nga benefit package para han mga biktima han cancer nga ginhimo han iba-iba nga mga eksperto tikang ha sub-specialties han oncology nga amo an cancer ha suso, prostate cancer, acute lymphocytic leukemia ha kabataan, ngan an kidney transplant, nga umatinder han Oncology Summit 2012 dida han Mayo.

An panuyo han special health program amo an paghatag han mga biktima nga nag-aantos han Type Z nga mga sakit, kun diin sering han PhilHealth, in maski ano nga sakit nga nanginginahanglan hin maiha nga pagkahospital, mga marahalon nga mga pamaagi han pagtambal, o iba nga mga porma hin pagtambal nga sobra nga makakaapekto han kanan pamilya panggastos, nga makakabulig pagtapo han mga magpaka-urolang.

Ini in makakab-utan han ngatanan nga mga kwalipikado nga mga meyembro han PhilHealth ngan han ira mga kwalipikado nga mga nakadepende matapos han iya opisyal nga paglunsad yana nga Lunes. (EOPT/Trans. by MAA-PIA8)