Waray news: Civil nga kaso kuntra kan Coloma ngan iya Undersecretary ginpawarayan bisa han Quezon City Court

By Marivic A. Alcover

Saturday 16th of June 2012

MANILA, Hunyo 16 (PIA) -- An huwes ha siyudad han Quezon in nagpawaray bisa han civil nga kaso nga iginpahamtang kuntra kan Presidential Communications Operations Office (PCOO) Secretary Herminio “Sonny” Coloma Jr. ngan han iya undersecretary hin usa nga nabayad hin buhis nga nangaro han Korte nga ipa-ukoy an operasyon han usa nga gintatag-iyahan han gobyerno ngan ginpapadalagan nga pan-imprenta nga kumpaniya.

Hi Judge Evangeline C. Castillo-Marigomen han Quezon City Regional Trial Court (RTC) Branch 101, in nagpawaray bisa han petisyon dida han Mayo 9, 2012.

An huwes in nagsering nga an petisyon nga iginpahamtang ni Richard G. Oderon in waray lugar para makumbinsi an Korte nga igdeterminar an kaso kuntra kan Secretary Coloma ngan han iya igkasi magbaraton nga hi Undersecretary Eduardo C. Visperas.

Ha pagpasa han petisyon para prohibisyon ngan mandamus ha Civil Case No. Q-11-69389, ginrepresentar ni Oderon an iya kalugaringo bali mamarayad hin buhis ngan diri bali empleyado han National Printing Office (NPO). Sering niya dida han iya ginpahamtang nga kaso nga an Pilipino nga nabayad hin buhis an lugi ha padayon nga mga operasyon han APO Production Unit, nga sige an pagpinan-imprenta hin security ngan accountable forms para han gobyerno.

An APO in klaro nga ada ha kategoreya bali usa nga government-owned and controlled corporation (GOCC) pinaagi han Republic Act No. 10147 o kilala bali “An Act to Promote Financial Viability and Fiscal Discipline in Government-Owned or Controlled Corporation and to Strengthen the Role of the State in its Governance and Management to Make Them Responsive to the Needs of Public Interest and for Other Purposes.” An nasabi nga Act in ginpirmahan para mahimo nga balaud ni Pangulo Benigno S. Aquino III dida han Hunyo 6, 2011.

Dida han Disyembre 7, 2010, an Republic Act No. 10147 han 2011 General Appropriation Act (GAA) in ginpirmahan nga magin balaud ni Pangulo Aquino, pagrekognisar ngan pag-upod han APO, kaupod han NPO ngan Bangko Sentral ng Pilipinas, bali usa han kanan gobyerno taga-imprenta.

An nagpetisyon in nagsering nga an APO in usa nga pribado nga korporasyon mahitungod nga ini in gintindog ha ilarum han mga Balaudnon han Pilipinas (Corporate Code of the Philippines). Dugang pa niya nga ini in nakarehistro ha ilarum han Securities and Exchange Commission. Pero, an magbaraton in nagsering nga an APO in usa nga GOCC.

An korte in umaboyon han argumento han mga tagreklamo nga an APO, usa nga non-stock nga korporasyon, in nagdudumara hin pan-imprenta hin mga security ngan accountable nga mga porma para gobyerno. Sugad han nakapahamtang han mga nahitutungdan, an APO in ha pagkayana ngan deretso nga ada ha pagkuntrolar ngan pagpadalagan ha ilarum han PCOO nga ada ha ilarum ha Opisina han Pangulo han Republika han Pilipinas.

“The APO is categorized and recognized as GOCC and as such is publicly accountable by being subjected to audit by the Commission on Audit,” sering han korte.

An APO in pwede nga legal nga makaaro ngan kumarawat hin mga trabahuon para mag-imprenta hin mga porma pangamit han gobyerno ngan sensitive high quality/volume nga mga panginahanglan pan-imprenta han gobyerno, sering han korte dida han desisyon.

“The petitioner has no legal standing to assail the constitutionality of RA 10147 as he has not established any direct injury that he has sustained or may sustain by reason of the assailed law. Neither has the petitioner established that public funds (derived from taxation) are being misspent or illegally disbursed,” sering han korte.

“Although the instant petition is styled as a petition for certiorari, in essence, it seeks the declaration by the court of the unconstitutionality or illegality of the GAA. It thus partakes of the nature of a petition for declaratory relief,” sering han korte. (EOPT/Trans. by MAA-PIA8)