Waray news: Aquino ginkarawat mga Hapon nga negosyante ha Malacañang

Thursday 14th of June 2012

MANILA, Hunyo 14 (PIA) -- Ginkarawat ni Pangulo Benigno S. Aquino in usa kagrupo hin Hapon nga mga negosyante para paghuro-himangrawan in posibli nga mga igpunpundar dinhi ha nasud nga makakaghatag hin opurtunidad pantrabahuna para han mga Pilipino.

An dako nga negosyante nga Hapon nga hi Tadashi Yanai, an nag-abri ngan pangulo han Fast Retailing Co., Ltd. in naghatag hin kurtesiya ngadto kan Pangulo Aquino didto ha Music Room han Palasyo han Malacañang dida han Huwebes han aga. Kaupod ni Mr. Yanai an iya asawa nga hi Teruyo; Naoki Otoma, an Fast Retailing Co., Ltd. Chairman ngan chief executive officer; Katsumi Kubota, an Fast Retailing Co., Ltd. Chief operating officer, ngan hi Teresita Sy-Coson, an vice chairman officer han SM Investments Corporation.

Presente gihapon dida han okasyon hera Department of Trade and Industry (DTI) Undersecretary Cristino Panlilio ngan hi DTI Assistant Secretary Fe Reyes.

An Fast Reiling Co., Ltd. in usa nga holding company. An specialty retailer UNIQLO an kanan Grupo mainstay operation, ngan ini in nakatagamtam hin makusog nga pagtubo pinaagi hin pagpagawas hin mga de-kalidad nga mga pan-casual nga isurol-ut ha resonabli nga mga presyo basi ha iya SPA (Specialty store retailer of Private Label Apparel) pan-negosyo nga modelo, ngan nagdudumara hin desenyo hin produckto, nanhihimo, ngan nandidistribwer para ipanmaraligya.

Una nga sumulod ha mga international market dida han 2001, an Uniqlo in han pagkayana nagpapadalagan na han ira negosyo ha iba-iba nga parti han kalibutan nga nag-uupod han U.K., China, Hong Kong, South Korea, Estados Unidos, France, Singapore, Russia, Taiwan ngan Malaysia. Ha 2011, an kumpaniya in nag-abri hin global flagship stores ha Taipei ngan Seoul, ngan didto han kanan New York prominente nga Fifth Avenue, bali kaparti han mga plano pagpahilawig han negosyo ha bug-os nga kalibutan. Ha katapusan han Pebrero 2012, nagpaparayaw an grupo hin maabot 849 nga mga tindahan ha Hapon ngan 234 nga mga tindahan ha iba nga mga merkado ha iba-iba nga mga lugar.

An Fast Retailing Co., Ltd. in nagsering nga nagpaplano hera pag-abri hin 50 nga Uniqlo nga mga tindahan ha Pilipinas ha tiarabot nga mga tuig. Usa nga Uniqlo specialty nga tindahan in nakatalaan pag-abri ha Hunyo 15, Beyernes ha SM Mall of Asia. (Trans. MAA/PIA 8)