Waray news: 7 nga EV LGUs nagpakakarawat P1-M Performance Challenge Fund

Wednesday 13th of June 2012

PALO, Leyte, Hunyo 13 -- Pito nga mga lokal nga pangobyernohan ha Sinirangan Bisayas in kada tagsa nagpakakarawat hin Performance Challenge Fund nga P1 milyones tikang kan Secretary Jesse M. Robredo han Hunyo 11, dida han pagdumaraon an Tapatan on Disaster Preparedness and Management in Eastern Visayas didto ha DPWH Multi-Purpose Hall.

An mga lokal nga pangobyernohan in nagpakakarawat han ika-duha nga panhatag han pag-ebalyuwar para han Seal of Good Housekeeping (SGH) ha Sinirangan Bisayas, pasabot in DILG Director Pedro Noval, Jr.

An mga lokal nga pangobyernohan sering ni Noval amo an Alang-alang, Burauen, ngan Jaro, nga puro natikang ha lalawigan han Leyte; Naval han lalawigan han Biliran; Hinunangan han Southern Leyte; Guiuan han Eastern Samar; ngan Laoang ha Northern Samar, nga pinanmili mahitungod han ira maupay nga pagpadalagan o perpekto nga pagpadalagan han maupay nga pangobyernohan.

An mga tseke in personal nga pinangarawat han mga alkalde han tagsa-tagsa nga nahitutungdan nga mga lokal nga pangobyernohan.

An Seal for Good Housekeeping para han mga lokal nga pangobyernohan in nahililinya han kanan ahensya kakumitido ha agresibo nga panginano han mga ginkikinahanglan pagpakurokusog han pagpadalagan nga gintatagan hin duon an pagigin abri hini, pagigin tangkod, partisipasyon ngan pagdumara han trabaho pagpakuro-kusog han institusyon.

An proyekto in nagdadahum nga mapakuro-kusog an pagpadalagan ngan pagpasarang han kaklaro hini ngan pagigin resposabli han operasyon ha lokal nga pangobyernohan.

Pinaagi han proyekto, an mga lokal nga pangobyernohan in magigin abri para han mga karuyag magbantay han paggamit ngan pagpadalagan han ira lokal nga mga kita para maseguro nga tanan nga mga pundo han lokal nga pangobyernohan in ginagamit para ha pagpa-uswag han opisina ngan han ira mga katawhan, lab-i na gud ha implementasyon han mga proyekto nga nabaton han mga panginahanglan ngan mga problema ha ira mga mulopyo.

An SGH in ginhahatag ngadto han mga lokal nga pangobyernohan nga nagpakita hin ekselente nga pagpadalagan han ira trabahuon ha gobyerno nga nag-uupod han pagplano, an maupay nga pagkapot han pundo, pagigin abri hini ngadto han mga mulopyo ngan pagigin responsabli, ngan gintatagan hin importansya an maupay nga pagpadalagan han mga nagkakapot. (Trans. MAA/PIA-8)