Waray news: Mga benepisaryo han Pantawid Pamilya ha diri maiha makakatagamtan na han mga benepisyo han PhilHealth

Friday 8th of June 2012

MANILA, Hunyo 8 (PIA) -- Iginkalipay ni Social Welfare and Development Secretary Dinky Soliman an pagpagawas han kanan PhilHealth Circular nga nagpapahamtang han pakatagamtam han ngatanan nga mga benepisaryo han Pantawid Pamilya han National Health Insurance Program (NHIP) nga mga benepisyo ha maski diin nga mga health care providers nga akreditado ha PhilHealth.

An mga benepisaryo han Pantawid Pamilya kaupod han ira mga ginsakupan in pwede na makatagamtam ha diri maiha nga panahon han mga benepisyo han PhilHealth, ha ilarum han Sponsored Program Component han NHIP, nga naghahatag hin subsideya tikang ha gobyerno para han health insurance han mga kablas nga mga pamilya. Ha pagkayana, mayda 3,005,025 Pantawid Pamilya nga mga benepisaryo.

An pakatagamtam han mga benepisyo in nagtitikang kinse ka-adlaw matapos mahipublikar an Circular dida hin usa nga peryodiko nga hilawig an pagpasarang.

Nagsering hi Secretary Soliman nga an mga kwalipikado nga mga benepisaryo han kanan PhilHealth Sponsored Program amo an mga nahipatik han Pantawid Pamilya nga nangungulo han pamilya nga mga benepisaryo, an ira legal nga asawa sugad han nakapahamtang dida han National Household Targeting System for Poverty Reduction (NHTS-PR) nga lista han DSWD, an ira mga anak nga ubos 21 anyos an edad ngan an ira mga kag-anak nga nag-eedad 60 anyos ngan tipa-igbaw.

Para makatagamtam han mga benepisyo han NHIP, an Pantawid Pamilya panguna nga benepisaryo nga meyembro nga mga pasyente in kinahanglan la magpresentar han ira Pantawid Pamilya ID card.

Sering ni Secretary Soliman nga an mga Pantawid Pamilya nga mga benepisaryo, kaupod han ira mga kwalipikado nga mga ginsakupan in may katungod han mga panguna nga care benefits nga nag-uupod han kunsultasyon, diagnostic services ngan mga medesina nga natikang han health care providers han PhilHealth. Sugadman, may katungod gihapon hera han inpatient ngan outpatient nga mga care services. (Trans. MAA/PIA8)