Cebuano news: P1.2-M coastal resource management center pagatukoron sa Siquijor

By Rizalie A. Calibo

Thursday 7th of June 2012

SIQUIJOR, June 7 (PIA) -- Ang Coastal Conservation and Education Foundation (CCEF), Inc. bag-o pa lamang mihimo sa groundbreaking ceremony alang sa pagatukoron nga P1.2-million coastal resource management learning center sa lungsod sa Larena sa lalawigan sa Siquijor.

Sa usa ka report nga gipadangat sa Philippine Information Agency, si Renan Ansing sa Department of Agriculture-Regional Field Unit-7 sa Siquijor mitaho nga ang paghimo gipundohan sa National Oceanic and Atmospheric Administration (NOAA), US Department of State, Deutsche Gesellschaft für internationale Zusammenarbeit or German Development Service (DED) ug sa David and Lucile Packard Foundation.

Una gihimo ang groundbreaking, adunay paglagda sa kontrata nga gihimo ni CCEF executive director Atty. Rose-Liza Eisma Osorio uban ni Dr. Rolito Estrellado, representante sa State Universities and Colleges (SUC), ug sa kontraktor aron mahimong pormal ang kooperasyon tali sa paghimo ug pagdebelop sa learning center sa isla, matud ni Lapinig.

Si Osorio, sa maong taho, miingon nga adunay duha ka proyekto ang gi-establisar sa tibuok nasud. Kini mao ang Fish Center sa Talibon, Bohol ug ang Learning Center nga pagatukoron sa Siquijor.

“This is the only Learning Center for the Coastal Resource Management (CRM) Project in the Philippines as foreign-funded through CCEF,” (Kini lamang ang learning center nga gipondohan sa langyaw pinaagi sa CCEF), Sumala pa niya.

Si Osorio usab miingon nga ang maong learning center maoy labing maayong simbolo sa kusganong implementasyon sa tanang CRM projects sa isla sulod sa napulo ka tuig.

Siya mianunsyo nga sa pipila ka mga bulan adunay mga langyaw nga bisita gikan sa Malaysia ug Vietnam nga mohimo ug cross visits sa learning center sa Siquijor.

“It is with this pride that Siquijor has this center to benefit not only students, farmers and fishermen but to some local government units as well,” (Dako kaayo natong garbo nga ang Siquijor nakaambit niining maong sentro aron usab makatabang sa mga tinun-an, mag-uuma ug mananagat), dugang pa niya.

Samtang ang lokal nga kagamhanang probinsyal nga girepresentahan ni Provincial Board Member Arturo Pacatang usab midayeg sa maong kaakohan ug misaad sa padayong suporta sa mga programa ug proyekto sa CCEF alang sa isla.

Si Pacatang ug si Provincial Agriculturist, Dr. Ramon A. Taroc, miapil sa groundbreaking ceremony uban sa mga municipal agricultural officers, fishery coordinators ug mga opisyales.

Ang groundbreaking gipangulohan ni CCEF executive director Osorio. (RAC/PIA-7 Siquijor)