Cebuano news: Kasabutan gilagda paglusad sa Brigada Eskwela sa Dumaguete

By Rizalie A. Calibo

Tuesday 22nd of May 2012

DUMAGUETE CITY, May 22 (PIA) -– Gisugdan kagahapong adlawa ang Brigada Eskwela 2012 sa siyudad sa Dumaguete uban sa paglagda sa kasabutan taliwala sa mga opisyales sa kagamhanan sa siyudad ug uban pang sumasalmot niini.

Ang kasabutan kon memorandum of agreement (MOA) gilagdaan ni City Mayor Manuel Sagarbarria, Vice Mayor Alan Gel Cordova, ug City Schools Division Superintendent Dr. Ramir Uytico didto sa Dumaguete City Central Elementary School.

Base sa maong MOA, ang mga opisyales misaad sa ilang aktibong partisipasyon aron pagsiguro nga andam ang mga tunghaan sa ilang pasilidades sa umaabot nga tingbukas sa klase karong Hunyo.

Atol sa paglusad, ang mga publikong tunghaan sa elementary sa siyudad ug sa probinsya nagdungan pagpanglimpyo, pang-ayo, ingon man pagpamental sa mga lawak ug mga pasilidades sa mga tunghaan.

Ang mga empleyado usab sa Department of Education milibot aron pagsusi sa gihimong pagpanglimpyo. (Translated by RAC - PIA 6, Siquijor)