Cebuano news: AFP mihangyo sa PPOC nga ipahimong iligal ang pagsul-ob sa camouflage nga uniporme

Uniporme sa military gi-smuggle sa Bohol

By Rey Anthony H. Chiu

Sunday 22nd of July 2012

CORTES, Bohol, July 22 (PIA) -- Gihangyo sa mga kasundalohan nga nangabaga sa internal security operations sa Bohol sa paghimo’g ordinansa sa lalawigan nga magdili sa paggamit sa mga uniporme sa kapolisan ug kasondalohan sa mga dili otorisado nga katawhan.

Kini dala sa nasagap sa military nga kasayuran nga may daghang uniporme sa mga militar ang illegal nga gipasulod sa Bohol ug gi-kahadlokang gamiton sa mga illegal o abuso aron pagdaut sa military.

Ang lakang usab subay sa pagpugong sa lain na usab nga hitabo nga ang illegal nga paggamit sa uniporme maoy lansis nga gihimo sa mga rebelde aron makuha ang kampo sa mga military sa lungsod sa Batuan niadtong mga 1980s.

Kahinumduman nga supak sa mga batakan sa gubat, dako nga salaud ang paggamit sa uniporme sa kontra aron paglingla sa kaaway.

Gawas sa posibleng paggamit sa uniporme sa military aron manghulga, mibutyag usab si Colonel Romeo Brawner nga may namatikdan silang gitumong nga kampanya sa mga legal fronts aron dauton ang kasundalohan.

Niining bag-o lang, may intelligence reports usab nga nasagap ang mga tinugyanan sa pagpasulod sa Bohol sa mga armas ug mga abono nga ammonium nitrate, popular nga sangkap sa bomba.

Kini human gikataho nga buot na mamalik sa Bohol ang mga mikagiw nga mga rebelde.

Sa laing bahin, gipadayag usab ni Brawner nga may mga nagpatoo nga sakop sa mga rebel returnees sa Bohol nga nagsulod sa mga kabaranggayan aron sa pagpamaligya.

Kini nga pamaagi, usa sa mga paboritong takuban sa mga bout mohimog salaud sa pagsulod sa mga hilit nga lugar aron ikasulti og balik ang mga tawong habig pa sa pundok walhon.

Subay niini, gihangyo ni Brawner ang PPOC sa paghimong lakang aron kining duha ka sugyot mahimong ikapatuman dinhi. (mbcn/rahc-PIA 7, Bohol)