Cebuano News: GSIS 7 miawhag sa taga gobyerno nga ubos og sweldo nga mopahimulos sa educational scholarship program

Friday 1st of June 2012

CEBU CITY, Hunyo 1 (PIA) -- Ang Government Service Insurance System (GSIS) miawhag sa mga trabahante sa gobyerno nga gagmay ug sweldo sa pagpahimulos sa bag-o nga scholarship program nga ilang gitanyag hangtud sa Hunyo 15 ning tuiga.

Regional Manager sa GSIS nga Si Ma. Fatima Alvarez, mipadayag nga adunay 200 ka scholarship slots sa tibuok nasud samtang ang Cebu ug Bohol adunay 10 ka luna lamang.

“Nagsugud mi ug dawat sa aplikasyon pag Mayo 15 kay gi-awhag man namu kadtong mga interesado mu sumitir nga kinahanglan nga maka pass na sila sa wa pa ang Hunyo 15, ug gipahibawo usab namu sila nga di na mi mudawat ug late nga mga aplikasyon”, matud pa ni Alvarez atol sa gipahigayun nga espesyal nga kapihan sa PIA niadtong biyernes sa buntag nga naghisgut mahitungod sa educational loan assistance ug scholarship programs sa maong ahensya.

Si Alvarez miingon nga ang prayoridad sa scholarship grants mao kadtong nagserbisyo sa publiko nga adunay salary grade nga 24 paubos.
“Au gisuta ug mayo ang mga aplikasyon arun mahibaw-an namu kung kinsa gyud katong angyan nga makadawat sa scholarship. Ang income tax return maoy atong basehan,” si Alvarez miingun.

Ang kwalipikado nga makapahimulos sa maong programa kinahanglan nga mu fill out sa application form alang sa scholarship grant ud isumitir kini sa opisina.

Sigun pa ni Alvarez, ang GSIS Board of Trustees mi ribisar sa pagpili ug mga iskolar ug gipaboran niini ang mga gagmay ug sweldo kaysa pagbasi sa inteligente sa usa ka isolar sa GSIS.

“Ang educational grants nato sauna grabe kayo ang kompetinsya kay ang grantee kinahanglan nga mag mintinar ug 85 porsyento nga general average,”si Alvarez mibutyag.

“ Mao na nga aduna taas nga porsyento sa terminasyon sa mga beneficiaries. Mao ni rason nga karung tuiga, ang scholarship grants mipabor sa mga nagtrabaho sa gobyerno nga gamay ug sweldo. Bisan pa man wa ni magpasabut nga ang iskolar kinahanglang mag mintinar sa gikinahanglan nga average grade," dagdag pa ni Alvarez.

Ang mga mapili nga mga iskolar mamahimung makakuha ug four or five-year nga kurso sa mga tunghaan nga level III ug level IV nga gi akreditar sa Commission on Higher Education (CHED),ug samtang anaa kini sa programa, ang hingtungdan pwede nga mu-ilis sa iyang kurso sa maka-usa sa iyang una o ikaduhang tuig sa kolehiyo.

Sa Cebu, ang mga tunghaan nga gi akreditar sa CHED naglakip sa Cebu Doctors University, Cebu Normal University, University of San Jose Recoletos, University of the Philippines, University of San Carlos u gang University of the Visayas.

Si Alvarez misaysay nga ang GSIS scholarship grants nagsugud niadtong tuig 1998 ug nakatabang kini ug 1,371 nga mga iskolar sa tibuok nasud.

Ang 10 ka scholarship slots alng sa Cebu ug Bohol karung tuiga abli pa. Si Alvarez misaysay usab nga kun adunay dili kwalipikado sa duha ka probinsya, ang 10 ka luna ihatag sa lain nga rehiyon.

Sigun pa ni alvarez, ang GSIS 7 gigahinan ug 10 ka scholarship slots. “Kadtong mga wala mapili karung tuiga mamahimu gihapung mu-apply sa sunod tuig," si Alvarez midagdag.(PIA-7/Niño Jesryl Maglasang, CNU Communication Intern)