Cebuano news: S&P credit rating upgrade, mipalig-on sa Aquino fiscal policy

By Elvira C. Bongosia

Saturday 7th of July 2012

TAGBILARAN CITY, Bohol, Hulyo 7 (PIA) -- Gitumbok karon sa Malacañang nga ang “BB+” rating sa Standard & Poor’s (S&P) sa Pilipinas nagpamatuod lamang nga epektibo ang fiscal management sa Aquino administration.

Sa maong credit upgrade, usa ka lakang na lang ang Pilipinas gikan sa investment grade status nga dugay nang gitinguha sa gobyerno aron mas modaghan pa ang mga mamuhunan sa nasud.

Matud pa ni Presidential Communications Sec. Ricky Carandang, samtang aduna pay debate karon tali sa pagdaginot batok sa paggahin og stimulus, napamatud-an sa Pilipinas nga kaya niining mogasto nga dili kinahanglang mohinay ang atong fiscal position.

Dugang pa ni Carandang, gipaningkamotan kini sa Presidente kauban ang economic team aron ma-upgrade ang credit status sa nasud.

"The President and the economic team have worked hard to win ratings upgrades and we”re another step closer to investment grade status," matud pa ni Carandang.

Gikan sa “BB+,” usa ka lakang na lamang ang Pilipinas sa “BBB-” credit rating, ang pinaka-ubos nga investment grade matud pa sa mga market participants.

Sunod niini ang “BBB”, “A,” “AA,” ug ang labing gitinguha nga “AAA.”

Apil sa mga nasud nga may “AAA” credit rating (as of January 2012) ang UK, Australia, Canada, Denmark, Finland, Germany, Hong Kong, Liechtenstein, Luxembourg, Netherlands, Norway, Singapore, Sweden ug Switzerland.

Ang “AAA” maoy pinakataas nga rating nga nagpasabot nga ang nasud nga aduna niini wala’y problema sa pagbayad sa utang. (“AAA” - extremely strong capacity to meet financial commitments, highest rating). (mbcn/Elvira Bongosia/PIA-Bohol)