Cebuano news: DFA, may bag-ong sistema na sa pagkuha og passport

By Elvira C. Bongosia

Sunday 1st of July 2012

TAGBILARAN CITY, Bohol, Hulyo 1 (PIA) -- Mas dali na ang proseso sa pagkuha og passport tungod sa bag-ong sumbanan nga gipagawas sa Department of Foreign Affairs (DFA).

Gipasigarbo ni DFA Secretary Albert Del Rosario sa ika-114 nga anibersaryo sa pagkatukod sa maong buhatan ang pagbaton og nationwide appointment system sa 2013.

Gimando na sa kalihim ngadto sa Office of the Consular Affairs nga ipahimutang hangtud sa katapusan sa Disyembre ang pagbutang og mga call center diin motawag ang mga aplikante aron magpa-iskedyul sa pagproseso sa passport bisan asa nga consular office sa nasud.

Dinhi, malikayan na ang taas nga pila tungod kay moadto na lang ang aplikante sa mismong adlaw ug oras nga gipili niini.

Kasamtangan pa gihapon gibalhin karon ang ubang consular office sa mga mall isip parte sa public-private arrangement diin abli kini gikan Lunes hangtud Sabado ug tulo ka oras nga abli kun sa adlaw nga Domingo.

Gimando na usab sa kalihim ang decentralization sa mga authentication service ug mahimo na usab kining ipahigayon sa San Fernando, Pampanga, Cebu ug Davao, gawas sa Metro Manila.

Gisiguro usab ni Del Rosario nga magpabilin sa P950 ang bayad sa regular nga processing sa pasaporte ug P1, 200 usab sa mas dali nga proseso. (mbcn/Elvira Bongosia-PIA 7, Bohol)