Cebuano News: Palasyo, nagtinguha sa P2 trilyong budget sa 2013

By Elvira C. Bongosia

Friday 15th of June 2012

TAGBILARAN CITY, Bohol, June 15 (PIA) -- Gi-plantsa na karon sa Malacañang ang balaodnon nga national budget alang sa sunod tuig nga gilauman nga mokabat sa P2 trilyon, 10-porsyentong mas daku kini gikan sa kasamtangang budget nga P1.8 trilyon.

Matud pa ni Budget Secretary Butch Abad nga ang pagdaku sa budget makatabang usab sa gobyerno nga mapatuman ang mga proyekto sama sa mga infrastructure ug paspas nga paghatag sa pondo alang sa mga public private partnership (PPP) projects sa gobyerno.

Giingong makatabang usab kini sa social services sa gobyerno sama sa conditional cash transfer program.

Target usab nila nga sa dili pa matapos ang 2013, masulbad na ang kakulang sa mga classrooms nga 65,000 gawas sa dugang 25,000 pang mga classrooms nga ipatukod sa sunod tuig ug 63,000 nga mga bag-ong magtutudlo.

Ang rural electrification, irrigation, roads ug bridges giingong apil usab sa mga nakalinyang tapuson sa tuig 2014.

Kasagaran isumite sa Presidente ang tinuig nga proposed budget sa Kongreso paghuman sa iyang State of the Nation Address (SONA). (mbcn/Elvira Bongosia/PIA-Boholl)