Cebuano news: Problema sa kakulang sa mga lawak-tunghaan ug magtutudlo, mikunhod

Friday 8th of June 2012

SYUDAD NG TAGBILARAN, Bohol, Hunyo 8 (PIA) -- Ang problema sa kakulang sa mga lawak-tunghaan ug magtutudlo matag sugod sa klase, mikunhod.

Mao kini ang giluwatang pamahayag ni Assistant Provincial Schools Division Superintendent Wilfreda Bongalos sa Departamento sa Edukasyon (DepEd).

Matud pa ni Bongalos nga bisan misaka ang gidaghanon sa mga estudyante karong tuiga, napangandaman na kini sa DepEd.

Sumala pa sa taho, 267,000 ang mga mitungha karong tuiga ug misaka sa kapin sa 5,000 kun itandi sa miaging tuig.

Dugang pa ni Bongalos nga dako kaayo ang natabang sa kagamhanang probinsyal sa pagtukod og dugang nga mga lawak-tunghaan sa mga nagkalainlaing tunghaan sa lalawigan.

Ubos sa Bayanihan “school building construction” sa administrasyong Chatto-Lim, mitukod og katorse ka mga “school building” nga adunay duha ka bag-ong mga lawak-tunghaan nga gitambayayongan sa Armadong Kusog sa Nasud ug DepEd.

Dugang pang katorse ang nahan-ay karong tuiga, sumala sa taho ni Dr. Cerina Bolos, ang konsultant sa edukasyon sa kagamhanang probinsyal.

Gibutyag usab ni Bolos nga mi-empleyo ug dugang 230 ka magtutudlo ang kagamhanang probinsyal aron kunhuran ang problema sa DepEd sa kakuwang sa magtutudlo. (RMN/ECB/with reports from EdCom-PIA7)