Cebuano News: Pagpalig-on sa kampanya batok dengue, gimando ni Gob. Chatto

By Elvira C. Bongosia

Thursday 19th of April 2012

TAGBILARAN CITY, Bohol, April 19 (PIA) -- Tungod sa mga sunod-sunod nga kaso sa Dengue dinhi sa dakbayan ug lalawigan, mipagawas ug memorandum si Gob. Edgar Chatto aron lig-onon ug palapdan pa ang kampanya batok sa sakit nga dengue.

Gimanduan ni Chatto si Dr. Reymoses Cabagnot, ang hepe sa buhatan sa panglawas sa Bohol nga mohimo ug mga lakang ug pama-agi aron masumpo ang maong sakit, ug lig-onon aron mamahimong malungtaron ang kampanya kabahin niini.

“Isip pamunuan sa lalawigan, aduna kitay mandato ug responsibilidad nga panalipdan ang katawhan ug hatagan ug solusyon ang maong problema”, matud pa ni Chatto.

Gipahinumdoman usab sa gobernador ang mga katawhan ug mga hingtungdan nga ahensiya nga ipadayon ang mga nahisgutang pamaagi, sama sa: adbokasiya o pagpahibalo, “search and destroy” nga pamaagi, kalihokan aron mabantayan ang lihok sa lamok, paspas nga taho sa mga nahitabu-an ug ang 4 “S” kabahin sa dengue nga mao ang: (1) search and destroy sa mga ang itloganan sa lamok, (2) paghimo ug self protection nga pamaagi (3) sayo nga pagpatambal, ug (4) no indiscriminate fogging.

Base sa talaan sa Provincial Health Office, adunay 69 na ka mga kaso sa dengue ang natala sukad sa buwan sa Enero diin 3 na ang namatay niini. (EB-PIA 7, Bohol)