Hiligaynon news: Kapisnon nga alpabeto pagabalayon

SYUDAD SANG ROXAS, Capiz, Agosto 3 (PIA6) -- Ginpangunahan ni Commissioner Jose Laderas Santos sang Komisyon sa Wikang Filipino (KWF) ang pagtalakay kaangut sa pagdihon sang ortograpiya sang Kapisnon nga linggwahe sang nagligad nga Hulyo 30 sa Kapitolyo Probinsyal diri sa syudad sang Roxas.

Ginpahayag ni Santos nga ang lokal nga linggwahe ang importante sa pagtudlo sa mga eskwela agud nga mas mahapos ang pag-intindi sang ginatalakay nga topiko.

Ang ortograpiya sang Kapisnon nga paghambal ang mangin mapinuslanon sa mga eskwelahan ilabi na nga sa pagsugod sang K to 12 nga programa sa edukasyon ang nagakinahanglan nga magamit sang “mother tongue” ukon lokal nga linggwahe sa pagtudlo sang leksyon halin sa Kinder tubtob Grade 3 sa pampubliko subongman pribado nga mga eskwelahan.

Samtang ginpahayag ni Alphonsus Tesoro nga amo ang Provincial Tourism and Cultural Affairs Officer sang Capiz nga ang pagdihon sang ortograpiya ang kaangut man sa prayoridad sang gobyerno nga pag-amlig kag pagtib-ong sang kultura kag tradisyon.

Gindugang pa ni Tesoro nga may serye sang mga pagtalakay nga patigayunon ilabi na nga may na-organisa nga grupo kaangut sa ortograpiya nga proyekto.

Nahibaluan nga ang Kapisnon nga linggwahe ang kabahin sang Binisaya nga mga grupo sang panghambal kapareho sang Ilonggo ukon Hiligaynon apang may kinaiya lang ini nga tono kon pamati-an. (JSC/AAL-PIA 6 Capiz)

Number of Comments: 0

  

  

• Notices
• PCDSPO
• Speeches

News from the Regions

PIA eMagazines