Hiligaynon News: 11 ka mga festival magapasundayag sa Capiz
Roxas City (24 November) -- Onse ka mga festival sa Rehiyon 6 ang magapasundayag sa probinsya sang Capiz sa pagbukas sang Western Visayas Assembly sa Disyembre 4.
Suno sa kay Western Visayas Tourism Regional Director Edwin Trompeta nga 11 na ka mga festival nagikan sa nagkalain-lain nga probinsya kag mga high urbanized city lakip na ang sa probinsya sang Capiz ang nagkompirma sang ila partisipasyon sa pagparada sang ila festival sa pagbukas sang Western Visayas Tourism Assembly.
Pila sa magapasakop diri ang Pintaflores sang San Carlos City, La Carlota Drumbeater sang La Carlota City, Cannon festival sang Bago City, Dinagyang Tribe kag Paraw Regatta Samba Dancers sang Iloilo City, Maskara Dancers sang Bacolod City kag ang Manggahan Tribe sang Guimaras
Igapasundayag man sang Antique ang ila Binirayan festival pinaagi sa Antique National School Dance Club kag magapasakop man angs Kalibo Ati-Atihan Tribe kag ang Ibajay Ati-Atihan Group sang Aklan.
Ang probinsya sang Capiz ang magapanagbalay sa amo nga hilikuton sa sini nga tuig nga magadungan man sa paghiwat sang probinsya sang iya tuigan nga Sinadya sa Halaran sa Disyembre 3 tubtob 8. (PIA) [top]
