Cebuano News: 160 ka tawo nadakpan sulod sa 2 ka semanang operasyon sa AIDSOTF
Manila (Marso 12) -- Miabot sa 160 ka tawo ang nadakpan ug 145 ka mga kaso na ang napasaka sa hukmananan human gipahigayon ang operasyon special task force sa Philippine National Police sa tibuok nasod gikan sa katapusang semana sa Pebrero ug sa unang semana sa Marso.
Sa iyang report kang Interior and Local Government Secretary Ronaldo Puno, ang hepe sa PNP anti-illegal drugs task force (AIDSOTF) nga si Police Drector Raul Bacalso miingon nga sulod sa maong panahon, nagpahigayon sila ug 38 ka mga buy-bust operations ug 84 ka mga pagronda ug nakadiskubre sila ug 4 ka mga plantasyon sa marijuana.
Ang maong operasyon miresulta pagkasikop sa 73 ka mga gidudahang tigpayuhot sa mga ginadiling druga ug 87 ka mga drug users sulod sa maong gidugayon, nakasakmit usab sa AIDSOTF ang 293 ka buok nga tanom sa marijuana; 12 ka stick sa marijuana; 129.73 ka gramong shabu; 50 ka botelyang menthodez syrup;ug uban pang mga substance sama sa nubain, ug rugby ug nagkalain-laing drug parahernallia nga dunay kinatikbu-ang kantidad nga miabot ug 835,932 pesos.
Ang AIDSOTF gimugna sa PNP aron suportahan ang kampanya sa PDEA batok sa ginadiling droga subay sa Orden Ehekutibo Numero 218 nga gipakanaog ni Presidente Arroyo niadtong tuig 2003. (PIA-Pagadian City) [top]
